Bajarê Dusseldorfî yê Almanya û paytextê Swêdî Stockholm de cinîyan bi laçiganê sipîyan bale ante hêrişê serê Dayîkanê Aşitîye yê ke semedê domananê xo her tim kuçeyan de hetê polîsanê Tirkî ra yenê kuwayene û destbendkerdene.

Bajarê Dusseldorfî yê Almanya de rayberîya Însîyatîfê Cinîyan ê Nalîn Mûşe de çalakîya paştdayîşê Dayîkanê Aşitîye ameye viraştene. Cinîyanê ke laçigê sipîyî antê xo û bêvengîya welatanê Ewropa û rayapêroyî ya dinya şermezar kerde û veng da Organîzasyonê Efû yê Mîyanneteweyî û waşt ke nê sucî rê hempar mebê.

Stockholm

Paytextê Swêdî Stockholm de zî semedê paştdayîşê Xoverdayoxanê Zîndanan û Dayîkanê Aşitîye çalakîyêk ameye organîzekerdene. Çalakîya ke hetê endamanê Meclîsê Cinîyan ê Amara ra ameye viraştene de cinîyan laçigê sipîyî antê xo û derheqê tecrîd û grevê vêşanîye de vilawekî vila kerdî. Cinîyan seba ke bale biance grevê vêşanîye ser bi mûman 7 hezar nuşt. Sereka Weqfê Heqanê Merdiman ê Tirkîya Prof. Dr. Şebnem Korur Fîncanci zî tewrê çalakîye bîye û paştî daye cinîyan.