Vîrardişê cinîya şorişgêre ya efsanewîye Sara (Sakîne Cansize) ke kadroyanê awankerdoxan ê PKKyî ra bîye hetê gerîlayan ra yeno ciwînayene. Kitabê aye yo bi nameyê ‘Cuya mi tim pêrodayîş bi’ seba embazanê aye yê ke firsend nêdîyê aye nizd ra bişinasê, înan rê kulîyatê mucadeleyî pêşkêş keno. Ewro Têgêrayîşê Azadîya Kurdistanî de bi desan Sarayî şopa Sakîne Cansize de şinê. 

NAMEYÊ CANSIZE GIREWT

Bi ‘Ganî senî bêro ciwîyayene’ tewrê ci bîye û bi ‘Cuya mi tim pêrodayîş bi’ zî xo rê nameyêkê neweyî girewt. Gerîlaya YJA STARî Sara Cûdî nê vatî: “Gama ke ez newe tewrê partî bîya nameyê mi Cûdî bi. Dimayo ke mi kitabê ‘Cuya mi tim pêrodayîş bi’ yê embaze Sara wend û vîdeoyê aye seyr kerdî mi qerar da ke nameyê aye bigîrî. Çunke embaze Sara ruh û xoverdayîşêko pîl a. Na yewe ra mi waşt ke aye zêhn û ruhê xo de bidî ciwîyayene.” 

'ŞERO ESAS ZIHNÎYET DE YO'

Cûdî vat: “Kîşta kitabê ‘Cuya mi tim pêrodayîş bi’ de vatişê aye yê ‘cigêrayîşê mi zî pêrodayîşê mi zî seba azadîye yo’ mi ser o tesîr kerd. Embaze Sara ma rê ramojnena ke ganî cinîyêk tena bi fîzîkkî nê bi zihnîyet zî şer bikero. Ez embaze Sara dir nêmenda la gama kes kitabê aye waneno fam keno ke aye hemverê zihnîyetê camêrdî de çiqa mucadeleyêko pîl dayo û bi xoverdayîşê xo yê zîndanê Amedî tarîx de nameyê xo nûşto. Bi girewtişê nameyê embaze Sara ez bawer kena ke ez do cuye hîna manîdar bikerî.

Embaze Sara tim bi prensîb û peymeyanê Rayberîye pêrodayîşê xo rayra berd. Ez zî wazena ke bibî layîqê embaze Sara. Mi bi nê cigêrayîşî raştîya xo fam kerde. No zî hîna zaf hêz dano mi. Ez bi heme estbîyena xo nê hîs kena.”  

'EZ ŞORIŞÎ RA DIMA BAXÇEYÊKÊ VILIKAN WAZENA'

Cûdî peynîya qiseykerdişê xo de nê vatî: “Eke embaze Sara nika verê mi de bibîyêne mi do aye ra bipersayêne ke sey cinîyêk aye hîsanê xo senî cuye rê heriknena û senî wina tim eşkena bihêz vindero. Embaze Sara vatêne gama şoriş virazîyo ez wazena ke baxçeyêkê min ê vilikan estbo. Aye vato ke cuya bi vilikan hîna xasek a.

Vatişê Gulnaz Karataşe (Berîtan) yo ‘Aya ke şer kena bena azad, aya ke bena azad bena xasek û aya ke bena xaseke yena heskerdene’ tewr zaf Sakîne Cansize îfade keno. Çunke embaze Sara wayîrê mucadeleyî, eşqî bîye û girêdayeyê peymeyanê Rayberîya ma bîye. Ez zî bi girewtişê nameyê embaze Sara wazena ka xasekîya Koyê Cûdî xo de biafernî. Ez eşkena vajî ke ez do tim bi cehdanê pîlan mucadeleyê nê bidî.”