Her roja ke şina çalakîyê grevê vêşanîye yê ke bi serkêşîya hemsereka KCD’yî Leyla Guvene hemverê tecrîdkerdişê Rayberê Şarê Kurdî Abdullah Ocalanî de ameybî destpêkerdene vila benê.

Grevê xeberdare Kîbrîye Evrene, Hîlal Olmeze û Evîn Kaya yo ke 16’ê Kanûn a 2018’î ra nata Zîndanê Amedî yê Tîpê E’yî de dewam keno kewt roja xo ya 114’ine, halê weşîya înan beno giran. Netîceyê serdana keyeyê înan de ke ewro kerdebî, keyeyan vat ke halê înan beno giran û hendî têgêrayîş de zehmetîyan ancenê.

Merdimanê Tepişteyan Nê Vatî

Kîbrîye Evrene: Hewteyê ravêrteyî ra yo zaf kuxena. Pîya bi kuxayîşî gonî fekê aye ra yena. Xeylî bêtaqet a, problemê aye yê sey dejê sereyi, dejê estan, bêhewnî û rayraşîyayîşî de zehmetî antişî estê.

Evîn Kaya: Roqiranê aye ra gonî yena. Nê wextê peyênî de nêeşkena çîyanê awîyan zî bişimo, nêeşkena rakewo, rayra şiro û halê aye krîtîk o.

Derheqê halê Hîlal Olmez a ke cezaya pêvînayîşî dîyaya ci zî nê ameyî vatene:

Dereceyêka vêşîye de problemê aye yê roqirayan estê. Seba ke roqirayê aye nêeşkenê gureyê xo bîyarê ci problemê qefsbîyayîşî tede vecîyayê.

Merdimanê tepişteyan ard ziwan ke halê Kîbrîye Evrene, Evîn Kaya û Hîlal Olmeze yê ke 16’ê Kanûne ra grevê vêşanîye de yê giran o, her hîrê tepişteyan zî tedawîbîyayîş red kerdo.

Çalakwanî Zulfîye Kişmîr û Mehtap a ke peynameyê ci nêame zanayene grev de roja 39’ine de yê, vîrakerdiş înan de peyda bîyo û bêtaqetî û dejê sereyê înan bîyo giran. Hetê îdareyê zîndanî ra ame vatene seba ke Mehtap û Zulfîye roja xo ya 40’ine nêkerda temam înan rê vîtamînê B12’î nêdîyayo.