Seba cinîyan û organîzasyonanê înan serra 2018 pirî vîyarte. Hêrişanê serê Efrînî yê ewilênan de hûmara cinîyan ê ke ameyî kiştene 180 ra vêşêr bî. Hewna zî qirkerdiş û remnayîşî virazênê, hetêna ra zî tewirê cinîyan ê xoverdayîşê 58 rojî yê Efrînî ewro zî Şehba de dewam keno.  

KAMPANYAYA CINÎYÎ SEBA EFRÎNÎ PAY RA YÊ

Kongra Starî bi nameyê Cinîyî Seba Efrînî Pay Ra Yê 2ê Sibate 2018 de kampanyayêka bi di merheleyan daye destpêkerdene. Heme sazî û organîzasyonê Vakurê Sûrîye yê cînîyan tewrê kampanya bîyî. Bi hezaran cinîyî 5ê Adare de seba paştîdayîşê Efrînî bi otobus, mînîbus û wesayîtan Dêrik, Qamişlo, Hesêke, Kobanê, Minbic û Heleb ra sey mertalê ganeyî şî ver bi Efrîn şî. Bi merheleya ewilêne ya kampanya ame ramotene dewleta Tirkî hêrişê îşxalî hemverê Efrînî de viraşto û bi qirkerdişan sûcê merdimîye kerdo.

Merheleya dîyine de hîna zaf giranî dîyaye hemverê îşxalî de girewtişê paştîdayîşê mîyanneteweyî. Çarçiwaya na merhele de bi dawetkerdişê Kongra Starî welatanê sey Almanya, Swîsre, Îngilîstan, Fransa, Norveç, Filîstîn, Lubnan û çar perçeyê Kurdistanî ra heyetê cinîyan ameyî Rojava. Dekewtişê tayê heyetan ê Şehba hetê hêzanê rejimî ra ame astengkerdene.  

 

 MECLÎSÊ EDALETÎ YÊ CINÎYAN

Menga Temmuze 2018 de Kongra Starî kongreya xo viraşte. Reyna dinya de sey nimûneyo ewilên xebatê Dîwanê Edaletî yê Cinîyan ameyî destpêkerdene. Çarçiwaya xebatan de 88 cinîyî ameyî perwerdekerdene ke nînan ra 50 hebî cinîyê Erebî bîyî. Dimayê Kongra Starî ra Meclîsê Edaletî yê Cinîyan zî bi konferansêk xo newe ra organîze kerd. Netîce de 16ê Teşrîna peyêne 2018 de Kongreya Meclîsê Edaletî yê Cinîyan ya 2. amî viraştene. Nê qerarî gîrîyayî: 

* Îlanê Meclîsê Edaletî yê Komelkîyî yê Cinîyan ê Vakur û Rojakewtena Sûrîye.

* Seba cinîyanê ke sazîyanê pabesteyê Meclîsê Edaletî yê Komelkîyî de yê viraştişê programanê perwerdeyî.

* Mîyanê 3 mengan de hadrekerdişê programê Meclîsê Edaletî yê Komelkîyî yê Cinîyan.

YPJ BI HÊZO AKTÎF Ê XOVERDAYÎŞÎ

Kongra Starî rizmê heme şertanê şerî de xebatê perwerdeyî domnayî. Komîteya Perwerdeyî ya Kongra Starî 2018 de 8 hezar û 541 cinîyî perwerde kerdî. Yewna qeraro ke wareyê xo ewilên bi awankerdişê dewa Jînwarî bi. Jinwaro ke goreyê perspektîfanê Rayberê Şarê Kurdî Abdullah Ocalanî yê derheqê azadîya cinîyan de amîbî plankerdene 25ê Teşrîna peyêne de amî akerdene.

Nîsane 2013 de YPJ ame îlankerdene û sey hêzêko aktîf pawitişê Rojava de cayê xo girewt. YPJyî Hemleya Firtineyê Cizîre de zî xusûsen 2018 de rolêko serkêş kay kerd. Heman wextî de xoverdayîşê Efrînî de zî giranîya xo da hîskerdene. Endama ci Şehîd Avesta Xabûre 27ê Çile 2018 de dewa Hemame ya Erînî de hemverê hêzanê îşxalî yê dewleta Tirkî de çalakîya fedaîye viraşte û xeta xoverdayîşî bewlî kerde.YPJyî mucadeleyê xo yê 2018î de 149 şehîdî dayî.   

XEBATÊ JÎNEOLOJÎ AMEYÎ HÎRAKERDENE

Tewrbîyayîşê cinîyan ê Ereban ê YPJyî zî bi vêşî. Bi desan cinîyan ê enternasyonalîstan verê xo da Rojava û zafê înan tewrê YPJyî bîyî. Çileya 2018î de Konferansê Jîneolojî yê Vakurê Sûrîye yo 1. ame viraştene, her şar û dormeyî ra 200 cinîyî tewrê ci bîyî.

2ê Çile de girêdayeyê Akademîya Jîneolojî Minbic de Merkezê Jîneolojî ame ronayene. Mektebanê Rojava de sey nimûneyêko ewilên ê dinya dersê Jîneolojî yê ke prensîbê cuya hempare ya camêrd û cinîyan ser o ronîyayê yenê dayene.

KONSEYA CINÎYAN A VAKUR Û ROJAKEWTENA SÛRÎYE

Seba teqdîmê Meclîsê Cinîyan a Vakurê Sûrîye xeylî semîner û panelî ameyî viraştene. Binê banê Meclîsî de Tebqa û Reqa de di akademîyî ameyî akerdene. Teşrîna verêne 2018 de komxebatêk ameye viraştene.

7 herêmê xoserî yê Vakurê Sûrîye 6ê Êlule de binê banê koordînasyonêk de ameyî yewkerdene û 10 konseyî ameyî ronayene. Nê konseyan ra yewe zî Konseya Cinîyan bîye. Konseya cinîyan xebatê xo kerdî hîra û bi komîteyanê cinîyan awanîya xo ya organîzasyonî xurt kerde. 

HADREYÎYA KONGREYA CINÎYAN A ROJAKEWTENA MÎYANÊNE

Vervatoxa Kongra Star Evîn Swêde vat ê wazenê ke 2019 de sere de sey Kongra Star xebatanê heme organîzasyonanê cinîyan hîna aver berê û Kongreya Cinîyan a Rojakewtena mîyanêne virazê. Swêde nê vatî: “Efrîn de cinîyan û şarê ma vat ma bê domananê xo eşkenê biciwîyê la ma erdê xo nêeşkenê biciwîyê. Heme çalakîyê Kongra Starî do seba azadîya Rayber Apoyî bêrê kerdene. Heme hêrişê ke hemverê cinîyan de yenê kerdêne eslê xo de cîyatî mabênê înan de çinya. Efrînî ramot ke heme cinîyî yew ê. Ma do 2019 de şorişê xo biresnê serfirazî. No sozê ma yo seba şehîdanê ma yê cinîyan ê serkêşan û heme şehîdan.”