Hemşaredara Dêrsimî Nurhayat Altun a ke di serrî ra zafêr o ke binê nezaretî de ya, rê 10 serrî ceza ameye birnayene

Roniştişê 11'ine yê dewaya ke bi îdîaya ‘endamîya rêxistine’  derheqê hemşaredara Dêrsimî Nurhayat Altune de ameya akerdene, Dadgehê Cezaya Giran a 1’in ê Dêrsimî de ame viraştene. Altun a ke Hepisxaneyê Tîpê F’yî yê Hûmara 1’ê Kandira yê Kocaelî de manena, bi rayîrê SEGBÎS’î tewrê roniştişî bîye. Roniştiş de avûkatî Reyhan Yalçindage, Levent Kanat, Fatma Kalsene û Mesut Baştar amade bîyî.

Destpêkerdişê roniştişî  de Nurhayat Altune heqê qiseykerdişî girewt û ard ziwan ke 2 serrî ra zêdetir o ke bi hawayêkê bê huqûqîyî yena girewtene û muhakemekerdişê ci huquqî nîyo, sîyasî yo. Altune ard ziwan ke heme xebat û çalakîyê ke tewrê ci bîya, xebatê partî yê û suc nîyê, heme çîyê ke kerdê zî rayapêroyî rê akerdî yê.

Altune ra dima avûkate Reyhan Yalçindage ard ziwam ke muhakemekerdişê muwekîla aye teberê huquqî de yo û waşt ke serbest bêro veradayene. Heyetê dadgehî qerar ercna, ‘endamîya rêxistine’ ra 10 serrî cezaya hepisî Altune rê birnaye.