Yewîya Cinîyan a Sara ya Swêdî, bajarê Orebro yê Swêdî de Kongreya xo ya Alelade ya 4. viraşte. Kongre de Leyla Guvene û xoverdayoxê grevê vêşanîye ameyî silamkerdene. Cinîyan ê Kurdan da zanayene ke heta ke tecrîd nêro wedaritene û Ocalan azad nêbo ê do bi hawayê qerardarî têkoşîn bikerê.

Cinîyê ke çar paçeyanê Kurdistanî ra ameyê û Swêd de ciwîyenê, kongre de ameyî têhet. Dimeyê deqayêk rêzgirewtişê seba vîrardişê şehîdanê têkoşînê azadîye, hemsereka PYD'yî Ayşe Hiso rewşa peyêne ya sîyasî ya Kurdistan û Tirkîya ercnaye.

Ma do Efrînî îşxalkeran ra apey bigîrê

Hiso ard ziwan, dewleta Tikrî seba destkewteyanê Kurdan ê Rojawanî werte ra wedaro bi çeteyanê DAÎŞ’î Efîn îşxal kerd û  vat, “Efrîn ê ma yo, bedelê ci  çi beno wa bibo ma do Efrînî îşxalkeran ra apey bigîrê. Heta ke vinetişê xoverdayoxan ê dayîkanê şehîdan, ruhê têkoşînî yê Avesta Xabûran bibo, ma do Efrîn û Rojawanî Erdoganî rê meverdê.”

Hiso dewamê giseykerdişê xo de weçînayîşê cayîyan ê 31’ê Adare yê Kurdistan û Tirkîya û tecrîdkerdişê Rayberê Şarê Kurdî Abdullah Ocalanî û grevê vêşanîye yê vera tecrîdî ercnayî.

Şarê Kurdî sindoqan de cewabêko tewr baş da Erdoganî

Hiso da zanayene, şarê Vakurê  Kurdistanî rixmê heme zext, hîle zordarîya faşîzmê AKP-MHP'yî îradeyê xo rê wayîr vejîya û vat, Şarê Kurdî cewabêko tewr baş sindoqan de da Erdoganî. Tirkîya de krîzî ekonomî û sîyasî esto, nê neteceyê weçînayîşî firsatê bîhnegirewtişî do bidê şaranê hetkaranê demokrasî.”

Hiso ard ziwan ke şarê çar parçeyanê Kurdistanî tecrîd qebûl nêkeno, çalakîyê Hemsereka KCD’yî û bi hezaran girewteyan ê vera tecrîdî silam kerdî û vat, “Paradîgma û îdeolojîyê Rayber Apoyî  înan zaf tersneno. Seba naye zî hêriş bi destkewteyanê şarê Kurdî, Kurdan kenê. Ma yê ke DAÎŞ qedênayo, bi ruhê xoverdayîşê Leyla Guvene eşkenê plananê qilêrinan ê dewleta Tirkî werte ra biwedarê. Projeyê Erdoganî yê serê Efrînî projeyê Tirkkerdişî yo. Dibistanan de bi Tirkî perwerde danê domanan û wazenê înan asîmîle bikerê. Seba kesê ke Efrînî de yê nasnameyê TC’yî ame dayene.”

Şarê Kurdî do îşxalî qebûl nêkero

Yewîya Cinîyan ê Rojawanî ra Moushira Mala Reshîde da zanayene, şorişê Rojawanî şorişêkê cinîyan o û ard ziwan, cinîyan her wareyî de; wareyê ekonomî, cimatî, sîyasî û eskerîye de xo rêxistin kerdo û rêxistinbîyayîşê xo xurt û pêt kerdo. Reshîde bale ante serê îşxalkerdişê Efrînî û ard ziwan ke şarê Kurdî do îşxalkeran tu cara qebûl nêkero û erdê xo îşxalkeran rê nêverdê.

Heta ke Ocalan azad nêbo ma do wareyan de bibê

Yewîya Cinîyan a Sara ra Ayşe Goktepe xoverdayîşê vera tecrîdî ercna û vat, cinîyê Kurdî do heta ke tecrîd bêro wedaritene û Ocalan azad bibo xoverdayîşê xo wereyan de dewam bikerê. Peynîya kongre de rayberîya newe ya Yewîya Cinîyan a Sara ameye weçînayene.