Endamê Komîteya Rayberdişî ya PKKyî Duran Kalkanî programê taybetî yê televîzyonê Medya Haberî rê qisey kerd. Erjnayîşanê Kalkanî ra qismêk wina yo:

''Hemleya Azadîye ya semedê azadîya fîzîkîye ya Rayber Apoyî dewam kena. Badê di serran pêvînayîşêk ame kerdene. No zî mojneno ke têkoşîn dano qezenckerdene. Bi têkoşînî do sîstemê tecrîdî bêro parçekerdene. Ma bi nê hedefî kewtî Serra newî. Coka ganî ma her ca de têkoşînî xurtêr bikerê. Wa çew vatişanê vengdan, sexteyan a mexapîyo. Ê qale veng ê. Binate de çîyêk çîn o. Dewlet Bahçeli veng qale keno. Bi zûran şarî xapînenê. Wina qeyde kenê ke têkoşînê semedê azadîya Rayber Apoyî zehîf bikerê, verê hemle bigîrê. Heta ke gamê mehkemî bêrê eştene, Rayber Apoyî ra eşkerayîye bêra û rêxistina ma eşkerayîya fermî bikera ganî çew goş medo vatişanê înan. Kam çi vano ma eleqdar nêkeno, ma ewnîyenê karê xo ra.

Sûrîye de bedilnayîşê muhîmî bîyî. Inkey her kes nê netecîyan ser o munaqeşe keno. Rewşe bewlî nîya. Sûrîye de afirnayîşê awanîya newî zor a. Xora Gazze û Lubnan de zî nêbi. Iraq de zî nêbi.  Çîyanê demdemî afirnenê.  Sûrîye de dîn û mezhebê cîya cîyayî est ê. Zaf grûbê şaran ê cîyayan est ê.Têna sîstemê demokratîk, konfederalî eşkenê nê hetan bîyarî têhet. Sîstemê ke demokratîk nîyê nêeşkenê tîya parya bimanê. Sûrîye ra dima do dora Iraq û Îranî bêro. Yew zî Tirkîya ya. Çarçewaya rayîrê enerjî û bazarîye de bakkîya rayîrî yena kerdene. Dora Kibrisî zî do bêra. Tirkîya merkezê şerî ya.  Coka wasifnayîşê Tirkîya û Erdoganî qalê veng ê. Îdareyê Tayyîp Erdoganî zehîf bîyo seba ke payra bimano wina keno.

Ê ke pêvînayîşê Rayber Apoyî sey şerrê taybetî şuxulnenê do peyra zaf poşman bibê. No îqtîdar zirar dano Tirkîya. Ma vat tênê Rayber Apo eşkeno bixelisno. Tirkîya têna çarçewaya azadîya kurdan de eşkena biba demokratîke. Eke wina mebo ameyoxê Tirkîya çîn o. Inkey kayan kay kenê la ê bi xo do vînî bikerê. Siba do semedê înan zaf bibo erey.

Ez xoverdayîşê Rojawanî selam kena. Şar zaf zanaye û rêxistinkerde xover dano. Şehîdan bi hurmetî yad kena. Bi hewayêkê qehremankî şar xover da, xover dano. Hema Tişrîn, Qeraqozax û Kobanê de xoverdayîş est o. Senî ke DAÎŞ û YPGyî vera yewbînan şer kerd, ewro ûca eynî hêzî vera yewbînan şer kenê. Tecrubeyê Îdareyê Xoserî yê Rojawanî semedê heme Sûrîye yew model o. Sîstemêk na ro ke heme şarî tede ca genê.12 serrî yo îdareyî tradîsyonêk pêard. Îdareyê Xoserî yê Rojawanî senî ke vera DAÎŞî xover da û paştdayîşê şaranê dinya girewt ewro zî  do wina xover bido paştdayîşê şaran ê bindestan bigîro. Sîstemê Rojawanî do heme Sûrîye rê bibo model.

Peynîya serra 2024î de şer dewam keno.Planê dewleta tirke reyna ameyî betalkerdene. Her cephe de şer est o. Rojawanê Zapî û Metîna bîyî merkezê şerrê 2024î. Dewleta tirke bi pêkerdişê xo yê Iraqî û paştdayîşê PDKyî vat qey e ser kewnê la reyna  ginayî piro û tede mendî. Eke paştdayîşê PDK û Iraqî ra nêbo ê nêeşkenê deqayêk ûca bimanê. PDKyî reyna tîmanê HPGyî rê dame naye ro. PDK ganî bi adirî kay mekero.

PKKyî Baxdad, Kerkuk, Hewlêr û Şingal vera DAÎŞî pawitî. Serekwezîrê  dewrî yê Iraqî PKKyî rê spas kerd. Mesût Barzanî şi Mexmûr de kiştê fermandaranê gerîlayan de nişt ro, şukranê xo teqdîm kerdî. Ma nêzanê Barzanîyî îfleh benê ya nê. Çunke îxanetî ra vejîyayî zehmet o.''