Mayan ra yewe ya ke verê Zîndanê Gebze de ya Sûltan Bozkurte hîşyar kerd û vat beno ke zîndanan ra tabûtî vejîyê.

Sûltan Bozkurte seba keynaya xo Newroz Bozkurta ke 1’ê Adare ra grevê vêşanîye de ya û seba embazanê aye o 26 rojî yo nöbete gêna. Maya Sûltana ke her reyî polis astengîye vernîya ci de ronena û derb wena, vat tecrîdo ke Îmrali de dest pêkerdo serê hemeyê cimatî de vila bîyo. Sûltan Bozkurte vat heta tecrîd bêro wedaritine a qerardar a mucadeleyê xo bidomno.

Tam 21 Serrî yo

Sûltan Bozkurte no 21 serrî yo dimayê keynaya xo Newroz Bozkurta ke cezaya heta bi hetayî aye rê dîyaya, zîndanêk ra şina zîndanêna. Bozkurte 1994 de dewa Yucelî ya Qoserî ra mecbûrî koç kenê. Bozkurte vat tena êyê ke rijnayîşê şerî zanê qîmetê aşitîye zanê. Bozkurte vat keynaya ci ya ke grevê vêşanîye yê bêdem û bêagêrayîşî de ya hewna domanîya xo de rîyo çetin ê dewlete dîyo û keynaya ci 14 serrîya xo de ameya destbendkerdene.

Keynaya Mi Zaf Ant…

Maye Bozkurte ya ke amirê polîsan o ke a asteng kerdebî ra persabî “no 20 serrî yo zere de ya, nika keynaya to amî to vîr?” vat, “Keynaya mi no 21 serrî yo bêhuqûqî tepişte yena girewtene. Gîşta xo nêdaya tu çîyêk ro. Gama amî destbendkerdene 14 serrî bîye, domane bîye. Înan a sey mesuldara Amedî name kerde û 27 rojan îşkenceyo giran aye rê kerd. Seba ke ê wextê destbendkerdişî de aye raste ra vînî nêkerê ma tim waştişname da dozgerîye. Gama ke aye zîndanê Êlîhî ra serbest amî veradayene înan kerd ke a bi wesayîtêk biremnê. Mi zaf ant. Ma wazenê na polîtîka hendî biqedîyo.”

Kardî Resaye Esteyî

Bozkurte vat kardî resaya esteyî, ganî Ocalan tavilî keye û avûkatanê xo bivîno û ard ziwan ke heta tecrîd nêşikîyo ne azadî û ne zî aşitî yena. Bozkurte vat domanê înan verê çimanê cimatî de roje bi roje helênê.

Sosyalîstî Çira Bêveng ê

Bozkurte tewr peynî de veng da her kesî ke hîsdar bê û bin ê vatişanê qiseykerdişê xo qedîna: “Domanê ma verê mergî de yê. Wa çew dima ra mevajo mi nêaşnawit, nêdî. Gama ke tabûtî vejîyayî çi kesê ke bêveng mendê do nê ra mesuldar bê û verî her kesî ma do qirika înanê ke bêveng mendê bigêrê. Rast e, dewlete dîktator a û tu game nêerzena la şima çira bêveng ê? Sosyalîstî çira bêveng ê? Ters heta key? Bi tersî merdim nêeşkeno xo merg ra bixelesno û cesaret eşkeno her çîyî bişikno. Tena serê birêz Ocalanî de nê serê her kesî de tecrîd esto. Çew nêeşkeno eşkerayîyêka çapemenîye bido, çew nêeşkeno vengê xo vejo. Na bêvengî heta key? Ganî ma vajê hendî bes o. Her kes wa vejîyo û paştî bido ma mayan, m ana barbarîye vindarnê.”