Tirkîya de partîyê sîyasîyî hadreyîyanê xo yê weçînitişanê cayîyan ê ke do 31ê Adare 2019 de bêrê viraştene kenê. Musabeqeyê tewr girdî mabênê keyeyanê mehla û dewan de yê. Goreyê doneyanê Komela Keyayan a Tirkîya Tirkîya de pêro pîya 50 hezar û 292 keyayî estê û hûmara keyayan ê cinîyan a camêrdan ra xeylî tay a.

‘8 BAJARAN DE KEYAYÊ CINÎYÎ ÇINYÊ’

Tirkîya de 73 bajaran de keyayê cinîyî estê, bajaranê Semsûr, Bedlîs, Colemêrg, Idir, Mûş, Êlîh, Şirnex û Sînop de çinyê. Perîhan Pekîna (49) ke weçînitişê cayîyî yê 2014î de dewa Akdîkî ya qezaya Pilemûrîye ya Dêrsimî de sey keyaye amî weçînayene 674 keyayan ê cinîyan ra yew a. Pekîne bi waştişê dewijan, xusûsen zî bi waştişê cinîyan weçînitişanê 2019î de zî namzeda keyayîye ya. 

‘GANÎ MA HER BEŞÊ ÎDAREYANÊ CAYÎYAN DE BIBÊ NAMZED’

Pekîne ard ziwan gama aye newe seba keyayîye muracat kerdo dormeyê ci ra tayê kesan îtîraz kerdo û vato cinîyî îdare ra fam nêkenê û nê vatî: “Ê tewiran ser o ez hîna bîya bixirs. Cinîyêk eşkena vaş zî biçîno, bibo parlamentere, bibo sereka şaredarîye û keyaye zî. Tena wa cinîyî biwazê, wa xo nêdê eciqnayene.”    

‘EZ BI WAŞTIŞÊ CINÎYAN NEWE RA NAMZED A’

Pekîne vat aye xusûsen bi waştişê cinîyan û kokiman newe ra bîya namzede û nê vatî: “Weçînitişanê cayîyan ê 2019î de xusûsen zî Dêrsim de seba keyayîye muracatê cinîyan bîyê vêşî. Her cinîya ke bena keyaye seba weçînitişanê bînan cinîyanê bînan rê bena cesaret.”

Pekîne heman wextî de vat hewna ke nêbîya keyaye bi waştişnameyan problemê elektrîk, awe û rayîrî resnayê qeymeqamîye, vero ke bêro weçînayene ê heme hal bîyê û wina vat: “Dewe de hewna zî hetê awe ra kêmasî esta, la seba halkerdişê ci ma cehd danê.”   

Pekîne peynîya qiseykerdişê xo de vat eke aye weçînitişê 2019î de ancî bêro weçînitene do xusûsen dewe de xizmetanê heywankarîye û zîretî ser o vindero û qiseykerdişê xo wina qedêna: “Ez wazena ciwanê ma erdan dir meşxul bibê. La ciwanê ma dewan nêwazenê. Ganî xusûsen verê ciwanan bidîyo bi zîret û heywankarî.”