Koordînasyonê KJK’yî derheqê serkewtişê QSD’yî yê hemverê DAÎŞ’î de eşkerayîya nûştekîye daye.

Eşkerayîya KJK’yî ya ke seba pîrozkerdişê serkewtişî amî dayene wina ya:

“Hêzanê QSD, YPG û YPJ’yî tarîxê 22’ê Adare de Dêrazor de bi viraştişê merasimêk hemverê DAİŞ’î de serkewtiş îlan kerd.  Bi nê hawayî erdo tewr peyên o fermî ke destê DAÎŞ’î de bi zî kewt destê hêzanê azadîye. Çîyo ke DAÎŞ pê ame binfînayene îdeolojî û şerê azadîye yê Rayber Apoyî bi. Bi nê serkewtişî oyo ke bin kewto tena DAÎŞ nêyo, heman wextî de mutefikê ci yo tewr pîl û dileteyê ci AKP yo. Îttîfaqê AKP-DAÎŞ’î waştêne ke Rojakewtena Mîyanêne de faşîzmê tarîyî vila bikerê û şaran, kulturan û cinîyan ê herême qirkerdişêkê pîlî ra ravêrnê, bi nê hawayî hegemonyaya xo awan bikerê. 

‘Felaketo Pîl Kurdistan De Ame Vindarnayene’

Bi nê serkewtişî felaketo tewr pîl ê merdimîye erdanê Kurdistanî de ame vindarnayene û qedênayene.  Bi serkewtişo ke Dêrazor de hemverê DAÎŞ’î de ame îlankerdene sere de yê cinîyan ê Êzîdîyan ê Şengalî yê ke ameybî esîrkerdene, qesasê şarê ma yê Êzîdîyan û heme şaranê bindestan ê Rojakewtena Mîyanêne û qesasê heme bawerîyanê ci ame girewtene.

Naye ra ma sey Koordînasyonê KJK’yî hêzanê QSD, YPG û YPJ’yî yê ke no serkewtiş merdimîye, cinîyan û şaran rê xelate kerdo silam û pîroz kenê. Ma heme şerwananê azadîye yê ke şerê hemverê DAÎŞ’î de şehîd kewtê bi vîr anê. Keyeyanê înan rê serweşîye wazenê. Şerwanê azadîye yê ke nê şerî de birîndar bîyê ma înan zî bi hurmet û heskerdişî silam kenê.

Şerwananê YPJ’yî şorişê Rojawanî de xeta Arîn Mîrkane de sey çimeyêkê îlhamî yê azadîye bi qehremanî şer kerd. Înan xeta azadîya cinî de pawitişê cewherî yê Şorişê Rojawanî rê serkêşî kerde. Bi nê hawayî hemeyê dinya dî ke şexsê YPJ’yî de cinîyê Kurdî bingeyê felsefeya azadîye ya Rayber Abdullah Ocalanî de senî aver şîyê û şexsîyetê azadîye afernayê. 

Bi serkêşîya azadîya cinî de pratîkkerdişê konfederalîzmê demokratîkî û modelê neteweyê demokratîkî yê Rayberîya ma şarê Kurd, Ereb, Suryanî, Ermenî, Çerkez û Tirkmenî bi pawitişêkê hemparî bingeyêko saxlem ê cuya azade ya pîyaye rona.

Hetêna ra kewtişê Dêrazorî, dêzê tewr peyênî yê destê DAÎŞ’î nêno na mana ke DAÎŞ bi temamî ameyo qedênayene.

‘Do Xelasîya Efrînî Bêro Rojdem’

Nika cayê ke DAÎŞ’î xo tewr zaf bica kerdo Efrîn, Idlîb û Cerablûs ê ke nê cayî binê kontrolê dewleta Tirkî de yê. Îqtîdaro faşîst û qirkerdox ê Erdoganî nika nê cayan de DAÎŞ’î dir pîya têgêreno û plananê tewr bexûdan ê seba qedênayîşê Şorişê Rojawanî virazeno. Na yewe ra heta Efrîn nêro azadkerdene û îqtîdarê AKP-MHP’yî nêro qedênayene do azadîye rastekîne ya şaranê herême û Rojakewtena Mîyanêne bica nêro. Bi hêzê serkewtişo ke Dêrazor de ame îlankerdene nika xelasîya Efrînî do bikewo rojdem.”