Koordînasyonê KJKyî bi wesîleya 25ê Teşrîna peyêne beyannameyê Mucadeleyê Şidetê Hemverê Cinî weşana.

Beyannameyê KJKyî de nînan rê ca dîyayî:

“Ma bi hurmet wayê Mirabelî yê ke serra 1960 de Komara Domînîkî de seba ke hemverê rejimê faşîstî yê dîktatorî de xover dayî ameyî qetilkerdene bi vîr anê. Ma nêkenê xo vîr ra ke çimeyê şidetê hemverê cinî û komelî sîstemo pederşahî yo û ma do mucadeleyê xo yê hemverê nê sîstemî bidomnê. Netîceyê nê sîstemî de bi mîlyonan cinîyî binê nameyê namûsî de ameyî qetilkerdene û ameyî tecawuzkerdene. Ma sey têgêrayîşê cinîyan soz danê ke ma do mucadeleyê xo yê hemverê faşîzmî rê bi qerardarî dewam bikerê. ”

SÎSTEM KENO KE BI QIRKERDIŞÊ CINÎYAN EMRÊ XO DERG BIKERO

Cehwerê sîstemê kapîtalîst-emperyalîstî paştîya xo dano dişmenî û kolonîzekerdişê cinîyan. Tarîx de Seydê Pîrebolçike nê rê nimûneyêk o. Bi Seydê Pîrebolçike cinîyê zanayî gane gane ameyêne vêşnayene. Dima ra dewrê netewe-dewletî ke seserra 19. û 20. de aver şi, hetê ci yo cinsîyetperwer eşkera bi. Nê dewrî ra tepîya şidetê dewlete û camêrdî yê hemverê cinîyan ame têhet û roje bi roje no şidet hîna bi xurt.

Hetê cigêrayîşanê îlimkîyan ra ameyo tesbîtkerdene ke ewro dinya de her hîrê cinîyan ra yewe raştê şidetî yena. Cinîyî Rojakewtena mîyanêne, Afrîka, Asya, Amerîkaya Latîne de yanî her cayê dinya de raştê şidetê fîzîkkî û psîkolojîkî yenê. Serra 1999 de hetê Miletanê Yewbîyayeyan ra 25ê Teşrîna peyêne sey roja mucadeleyê şidetê hemverê cinî ameyo îlankerdene. No netîceyê averşîyayîşê xoverdayîş û organîzasyonkarîya cinîyan de bîyo.    

AMACÊ ŞERÊ DINYA YÊ HÎRÊYINÎ BI HAWAYÊKÊ XORÎYÎ KOLONÎZEKERDIŞÊ CINÎYAN O

Ewro merkezê şerê dinya yê hîrêyinî de Rojakewtena mîyanêne esta. Nê şerî de tenya şerê tîcarî, dîplomatîk yan zî sîyasîyî çinyê. Şero tewr pîl hemveê cinîyanê ke wazenê bibê azad de ameyo îlankerdene. Merkezê nê şerî de cinîyan bi hawayêkê hîna xorîyî kolonîzekerdiş esto. Nê serranê peyênan de vêşîbîyayîşê şidetê hemverê cinîyan nê dir eleqedar o.

ÎQTÎDARÊ ERDOGANÎ SERKÊŞÎYA ŞIDETÊ HEMVERÊ AZADÎYA CINÎ KENO

Hemverê têgêrayîşê ma yê azadîya cinîyan ê ke Vakur û Rojava de yê şerêko pîl yeno dewamkerdene. Çende mucadeleyê azadîya cinî yê kurdan Rojakewtena mîyanêne û Kurdistan de beno xurt hemverê nê de hêrişî zî hende benê vêşî. Zihnîyetê DAÎŞî yê ke Şengal de xo ramot, zihnîyetê dewleta tirkî ya ke kewte Efrînî dir yew o. 

Hedefo bingeyên ê îqtîdarê AKP-MHPyî yo faşîst û yê rejimê Erdoganî Vakurê Kurdistanî û Tirkîye de qedênayîşê cinîya azade û komelê azadî yo. Qanûnê ke nêseypêyîye û bêedaletîya hemverê cinîyan hîna kenê vêşî meclîsî de ameyî qebûlkerdene. Bi nê hawayî zexr û zorê hemverê cinîyan yenê hîra û vilakerdene.  

Cinîyî her wareyê cuye de binê hêrişêkê pîlî de yê. Cinîsyetperwerî amîya vêşîkerdene. Şorişê cinî yê Rojava yeno hedefgirewtene. Îran decinîyî hemverê rejimê zextdarî de xover danê. Eke do Îran û Rojakewtena Kurdistanî de şorişêk virazîyo, bêguman no do bi destê cinîyan bibo. 

GANÎ SEBA EFRÎNÎ HEME CINÎYÎ HURZÊ

Dişmenîya tewr pîle ya hemverê Konfederalîzmê Demokratîkî, projeya Neteweya Demokratîke û azadîya cinî hetê rejimê Erdoganî yê faşîstî ra yena kerdene. Hêrişê hemverê Kantonê Efrînî ke serra 2018 de virazîya na çarçiwa de ya.

Delîlo tewr konkret ê yewbîyayîşê polîtîkayanê DAÎŞî û Erdoganî Efrîn o. No hêrişê hemverê Efrînî şexsê şarê ûcayî de hemverê mucadeleyê azadîya cinî yo. Şexsê Avesta û Barînan de azadîya cinî hîna bi xurt. YPJyî sey hêzêkê pawitişî yê Şorişê Rojava bingeyê prensîbanê unîversalan de cinî û şarê Kurdistanî pawitî.   

Na yewe ra ma veng danê heme cinîyan ê dinya ke wa şidetê hemverê cinîyan ê Rojakewtena mîyanêne û yê welatê xo protesto bikerê û qirkerdişanê ke Efrîn de virazênê rê bêveng memanê. Ma roja 25ê Teşrîna peyêne de slogana “SEBA EFRÎNÎ WA HEME CINÎYÎ HURZÊ!” meydanan de berz bikerê. Hemverê şidetê dewlete û camêrdî tenya  25ê Teşrîna peyêne de nê, heme rojan meydanan de bê û seba azadîya cinîyan mucadele bikerê. Ma sey cinîyî bi aqilê xo, keda xo û qerarê xo ameyoxê xo newe ra biafernê.''