Gerîlaya YJA STARî ya Hînistanije Jînda Cûdî vana “Ma seba dinyayêka zafziwan, zafkultur û zafrenge mucadele danê. Ez sey Hînde seba ke felsefeya Rayber Apoyî ra zaf mutesîr bîya tewrê ci bîya.”

Şerî qedera coxrafyayêk vurnenê. Tesîrê qirkerdişan, sirgûnan, mergan û terteleyan sey trajedîyan bi seyan serran dewam kenê. Koçberê Hîndistanijî û Pakîstanijî yê ke rîyê şeran ra koç kerdê zî gama şinê coxrafyayêka newî hetêk ra kulturê xo benê ûca hetêna ra zî xusûsîyetanê kulturkîyan ê a coxrafya ra mutesîr benê. Senî ke cinîya ciwane ya bi nameyê Jînda Cûdî a ke koyanê Kurdistanî de vejîyaye vernîya ma mutesîr bîya…     

PKKYÎ ŞAM DE NAS KENA

Jînda Cûdî ya Hîndistanije ya ke newe newe Kurdkî musena gama ke xoîfadekerdiş de kewena zehmetî ziwanêko bîn ê herême Erebkî keweno dewre. Keyeyê înan rîyê pêkewtişanê mabênê Hîndistan û Pakistanî ra koçê Minbicî kerdo û ûca ra zî koçê Tirkîya kerdo. Dimayo ke wextêko kilm Tirkîya de mendê koçê Şamî kerdo.

Aye PKKyî Şam de nas kena û tewrê ci bena. Cûdî vana: “Ez xoverdayîş û mucadele hîna zaf tîya embazan ra musaya. Nê koyan de çîyê ewilênî yenê kerdene, artêşbîyayîşê cinî xeylî muhîm o, ganî ma ercê ci bizanê û minetdarê Rayber Apoyî bê. Dimayo ke ez tewrê PKKyî bîya mi Rayber Apo hîna rind nas kerd û hendî ez hîna zaf bawer kena ke do Rayber Apo cinî azad bikero.”  

KURDKÎYA XO AVER BENA

Jînda veng dana heme cinîyan ê dinya ke çarçiwaya paradîgmaya Ocalanî de pîya rayra şirê û vana: “Mucadeleyê ma seba heme şar, dorme û bawerîyanê bindestan o. Ma seba dinyayêka zafziwan, zafkultur û zafrenge mucadele danê. Kurdkî û Hîndkî de xeylî çekuyî yewbînan rê nizd ê. Ez Kurdkî musena la problemê min ê ziwanî çinyo. Ma cîyatî nêfînenê mabênê ziwanan. Ez sey yew Hînde seba ke felsefeya Rayber Apoyî ra zaf mutesîr bîya tewr bîya.”  

GANÎ DIŞMENÊ KURDISTANÎ ŞIRÊ

Cûdî dewamê sohbetê ma de nê vana: “Ez embazanê xo ra hêzê cuye yê xeylî pîlî gêna. Ma pîya mucadele danê û her çî seke ma rê wareyêkê perwerdeyî yo. Hende çîyê ke sîstem de nênê ramojnayene tîya estê ke merdiman tîya ver bi zanabîyayîşî benê.

Ganî dişmenê Kurdistanî nê bizanê ke nê koyî bi cinîyanê ke vengdayîşê Rayber Apoyî vejîyayê ko bîyê pir. Ganî dişmenê Kurdistanî nê erdan ra şirê. Ê bi îşxal û qirkerdişî nêresenê cayêk. Çunke tîya erdê Kurdistanî yê û do gerîlayê ci zî pawitişê nê erdan bidomno.”

Jînda Cûdî peynî de nê vatî: “Cinîyî şorişî ciwîyenê, hêz û heskerdişê xo danê şorişî. Ganî heme cinîyê ke sîstem de nêeşkenê nefes bigîrê seba vînayîşê ruhê fedaî, azadîya cinî, organîzebîyayîşê cinî û hêzê cinî bêrê.”