Têgêrayîşê Cinîyan ê Azadan (TJA) startê kampanyaya xo ''Bi Jin, Jiyan, Azadî; Ver bi Azadîye'' qezaya Qoserî ya Mêrdînî de dabî. Çalakîyî do 8 rojan qezayanê Mêrdînî de dewam bikerê û 25ê teşrîna peyêne de bi rayraşîyayîşê Mêrdînî do biqedê.

Hemsereka HEDEPî ya Qoserî Aysele Ayav derheqê babete de ANFyî rê qisey kerd. 

Aysele Ayav pare kerd ke dewlete Kurdîstan de vera cinîyan polîtîkayanê şerê taybetî ana ca û vat: ''Prosesê xoverdayîşê xoîdarekerdişî ra dima dewlete xîret kena ke cinîyan mîyanê komelî ra veja. Ma do têkilîyanê komelkî û hîsanê paştdayîşî xurtêr bikerê û rayîr nêdê polîtîkayanê şerê taybetî.''

Aysele Ayav îfade kerd ke seba çalakîyanê 25ê Teşrîna Peyêne înan Qoser de startêko xurt dayo û vat: ''Çarçewa kampanyaya xo de ma do Tirkîya û Vakurê Kurdîstanî de çalakîyanê pîlan bikerê. Bi taybetî seba Merdînî ma bernameyêko xurt amade kerd. Serranê peyênan de Mêrdîn de mîyanê ciwanan de şuxilnayîşê kundoxî zêdîya. Hêzê emnîyetî zî vera bazirgananê kundoxî çîyêk nêkenê.

Ma armanc kenê ke têkilîyanê komelî yê bi ciwanî û komelî xurtêr bikerê. 25ê Teşrîna Peyêne ra dima zî çalakî û xebatê ma do dewam bikerê. Ma do vera polîtîkayanê şerê taybetî têbigêrê.''