Maya Ayten Beçete: Ganî tecrîd hinî bêro wedaritene!

Maya Ayten Beçete Fatma Beçete waşt ke tecrîd bêro wedaritene û va “wa zerrîya mayanê binan nêveşo”.

Girewteye Ayten Beçete, Hepisxaneyê Girewteyî yê Cinîyan ê Gebze de, seba ke tecrîdê serê Rayberê Şarê Kurdî Abdullah Ocalanî bêro wedaritene, çalakîya fedaîyîye kerde û saet 05.00 de bedene xo vêşna. Ap û pîyê Beçete seba ke cenazeya Ayten Beçete bigîrê ver bi Stenbolî kewtî rayîr.

Maya Beçete, Fatma Beçete, Dîlok de xebera şehîdbîyayîşê kênaya xo,cîrananê xo ra girewta. Dayîka Beçete ajansê MA’yî rê qisey kerd û va ”Mi tewr peynî roşanê remezanî de kênaya xo dîye. Hewteyê verî, roja pancşeme de ma telefon de qisey kerd û mi ra va rewşa ma başe ya û mi meraq mekerê, wa zerrîya şîma asane bo. A grevê vêşanîye de nebiye û embazanê xo rê wayîrtîye kerdêne. Telefon de mi ra va ‘ez do nê rojan çiyêk bika’. La mi fehm nêkerd ke se vana. Mi ra hêrs bîye û va şima çira nêşonê zîyaretê xoverdayoxanê grevê vêşanîye.”

Dayîka Beçete vera tecrîdî reaksiyon da û wina va: ”Wa tecrîdê serê Ocalanî bêro wedaritene. Wa no şer zî êdî biqedîyo. Ma nêwazenê ke kes bimiro. Zerrîya mi veşaya, wa ê yew dayîka bîne nêveşo. Wa dayîkî warizê payan ser û vajê ‘êdî bes o’. No çend mengî yo ke merdimi grevê vêşanîye de yê.”

Qaso ke xebere ameya girewtene, cenazeya Ayten Beçete, sazîya Adlî Tipî ya Yenîbosna ra ameya girewtene. Cenazeye do Dîlok de bêro wedardayene.