Mektuba Leyla Guvene PE de ameye wendene Parlamentoyê Ewropa de ame wendene. Konferans de parlamentera HDP’yî ya Îzmîrî Serpîl Kemalbaye, parlamentera verêne Besîm Konca zî amade bîyî.

Konferans de Serpîl Kemalbaye vat ê Tirkîya de vera rejîmo ke zaf otorîter bîyo de têkoşînêkê xurtî danê.

Kemalbaye: Seba haştîye û çareserîye ganî tecrîd bêro wedaritene

Kemalbaye, nê têkoşînî de bale ante serê rolê rayberîya cinîyan û Leyla Guven a ke vera tecrîdê serê Rayberê Şarê Kurdî Abdullah Ocalanî 146 rojî yo grevê vêşanîye de ya arde vîrî. Kemalbaye  seba ke meseleya Kurdî bi haştîye çareser biba qalê muhîmîya wedaritişê tecrîdê serê Ocalanî kerd û ard vîrî ke 1’ê Adare ra nata zîndananê Kurdistanî de û Tirkîya de 5 hezaran ra zêdetir girewteyî grevê vêşanîye de yê û kîşta grevê vêşanîye de bala ante serê çalakwananê cinîyan ê girewteyan. Kemalbaye vat Leyla Guvene nêwazena hepisxaneyan ra meyîtî bivejîyê, wazena Tirkîya de na bêhuqûqîye bêro qedînayene û seba naye zî mektubêk şawite.

Mektuba Leyla Guvene ameye wendene. Guvene mektube de bale ante serê bêvengîya dezgehanê mîyanneteweyîyan û vat, “Bawer bikerê, bi heme hêzê xo ma vera tecrîdî têkoşîn kenê.” Guvene da zanayene ke bi semedanê trajî-komîkan bi hezaran merdimî hepisxaneyan de kewtê grevê vêşanîye û vat, “Teberê grevê vêşanîye de mi rayîrêk nêdî  ke ez pê xo îfade bikera.”

Guvene: Sey Bobby Sandsî amade ya ke cuya xo bida

Guvene vat ganî cimatê mîyanneteweyî goş bidê waştişan ser û derheqê rewşa xo de zanayîşî dayî û vat, sey Bobby Sandsî yê Îrlandayijî yo ke 1981 de 66 rojan ra dima cuya xo daya, a zî amade ya ke cuya xo bida.Guvene da zanaye ke temamê dinya de paştdayîşê cinîyan esto, no hêz dano aye û waşt ke no paştdayîş hîratir bêro xurtkerdene.

Cinîyî do dinyayêka bîne awan bikerê

Guvene da zanayene rewşa aye û hevalanê aye kewta sewîyeya krîtîke, vengdayîş bi hemeyê cinîyan kerd û vat, “Vera sîstemê nêrî yê globalî de ma pîya eşkenê têkoşîn bikerê.” Guvene hetê bînî ra bale ante ser ke, a bawer kena ke ê eşkenê dinyayêka bîne awan bikerê û vat, “Ez bawer kena ke na do bi destê cinîyan bêra kerdene.”

Forenza: Ma deyndarê cinîyan ê Kurdan ê

Parlamentera Îtalyanije Eleonor Forenza zî bale ante serê waştişanê çalakwananê grevê vêşanîye û vat, ê  vera cinîyan ê Kurdan xo deyndar vînenê, cinîyanê Kurdan musna ma ke ganî ma sîyasetî ser o reyna bifikirê û wina dewam kerd, “Goreyê mi ma deyndar ê. Ma bi paştdayîşê Leyla Guvene eşkenê deynê xo bidê.”

Bjorke:  No têkoşîn vera faşîzmî seba haştîye yo

Partîya Çepe ya Swêdî ra parlamentera PE’yî Malîn Bjorke ard ziwan ke no têkoşîn eynî wext de seba haştîye vera faşîzmê Erdoganî yo û vat, seba Tirkîyayêka  demokratîke hewcedarîye bi Leyla  Guvene û hevalanê aye esta û Leyla Guvene rê silam şawit.

Warde: Eke ma pîya bibê beno ke ma bieşkê çîyêk bibedilnê

 Parlamentera Îngîlîze Jûlîe Warde zî vat, “Wexto ke ma pîya bibê beno ke ma bieşkê tayê çîyan bibedilnê.” Warde vat ganî komîsyon bi her hewayî bikewo mîyanê têgêrayîşî.

Kemalbaye: Ganî delegasyonêk bişawo

Qiseykerdişan ra dima reyna Kemalbaye heqê qiseykerdişî girewt û vat no tewirêkê paştdayîşî yo û zaf muhîm o.Kemalbaye Margaret Owen a 85 serrî ya ke Îngilistan de kewta grevê vêşanîye rê sipas kerd. Kemalbaye vat ganî PE delegasyonêk bişawo û seba ke CPT rolê xo kay bikero zextî ci rê bêrê kerdene.