Ewro serrgêra awanbîyayîşê YPJ’yî ya 6’ina. Vervatoxa YPJ’yî Nesrîn Abdullahe bi wesîlaya roje ANF’yî rê qisey kerd.

Nesîn Abdullahe derheqê YPJ’yî de wina qisey kerd: “YPJ serra 2013’î ra nata Rojawan û Bakûrê Surîye de vera DAÎŞ’î xover dano û netîceyê nê mucadeleyî de 52 hezar kilometrekare erd ameyo raxelesnayene.5 mîlyonî ra zêde merdimî ameyî raxelisnayene û zêderîyê înan doman û cinîyî bî. No xoverdayîş de 600 embazê cinîyî şehîd kewtî, bi hezaran zî bîyî birîndar. Azadîya welatî û cinîyî seba ma pîroz ê û ma seba nê her di pîrozîyan ganê xo da. Roja verî ra heta ewro, ma bi na rastîye mucadele kerd. DAÎŞ dişmenê cinîyan bi û gefêko pîl bi. Tena hetê leşkerîye ra nê, ma DAÎŞ hetê îdeolojî û kulturî ra zî sey dişmen dî. DAÎŞ’î bi zîhnîyetê xo yê qilêrinî, şer de zî cinîyan rê dişmentîye kerde. DAÎŞ’î zî fam kerd ke ma tena bi çekanê xo vera înan şer nêkenê. Ma vera pêro çeteyanê cîhadîstan şer kerd.

Eke cinîyan şerê vera DAÎŞ’î de cayê xo ke nêgirewtêne, DAÎŞ zor ameyêne qedenayene. YPJ no şer de bî wayîrê hêzê manewîyî. No şer de YPJ’yî tersêko pîl da bi DAÎŞ’î. Çunke DAÎŞ û çeteyanê binan hemverê xo de leşkeri dîbî la leşkere cinîyî nêdîbî. Leşkerîyêka wina qerardare nêdîbîye. Çunke leşkerîyanê binan seba stratejîyê sîyasîyan peuser game eştêne û eşkîyenê înan de têser bikerê. La YPJ’yî qedenayena dişmenê cinîyan xo rê kerdîbî armanc.

YPJ seba cinîyanê dinyaye bî nasname

Hem Rojakewtena Mîyanêne ra, hem zî pêroyê herêmanê dinyaye ra cinîyî  beşdarê YPJ’yî bîyî. Ey embazanê m ara tayê kesê winasîyî şehîd kewtî: Îvana, Helîne, Toprake… Kobane ra dima YPJ bî hêzêko enternasyonal.YPJ seba pêroyê cinîyanê dinyaye bî nasnameyê cinîyan. Serkewtişê YPJ’yî ra yew zî no yo.Şorişê Rojawanî bî şorişê Surîye û pêro dinyaye. Coka bi seyan cinîyê ke kurdî nêbîyî zî beşdarê YPJ’yî bîyî. Seba cinîyanê dinyaye hêzêko winasî hewce kerdêne. Eke haştîye, edalet û seyyewbînîye ke bêro dinya, no ancax bi destê cinîyan beno.  

Gefê dewleta Tirkî dewam kenê

YPJ do heta ke Efrînî azad nêkero mevindo. No seba ma armanco tewr muhîmo û ma no derheq de amadekarîya xo kerda temam. Ma kenê ke xo hîna bikê profesyonel. Ma ver de konferans esto. Konferansî de do qerarê neweyî bêrê girewtene. Hetê rêxistinîyî ra ma do seba prosesê neweyî xo amade bikê.Welatê ma ser gefê pîlî yenê wendene. Dewleta Tirkî kena ke îşxalkarîya xo hîna aver şoro. Eşkera aseno ke wazena pêroyê welatî îşxal bikero. Senî ke Ezaz, Cerablûs, Bab, Efrîn îşxal kerd, nika zî wazena ke herêmanê ma yê binan zî îşxal bikero. Şaro Kurd, hêzê ma, hêzê QSD’yî û şarê pêro herêman vera nê xetereyî amadekarîya xo keno. Heta ke ma dest ra bêro, ma do welatê xo bîşeveknê.

Ma seba çareserîya demokratîke amade yê

Ma seba çareserîya demokratîke amade yê. Rayberîya xoserîya demokratîke bi desan dolime va, ‘Ma seba ke problemê Surîye çareser bibo, prosesê çareserîye rê amade yê’.” Nesrîn Abdullahe peynîya qiseykerdişê xo de 4’ê Nîsane, serrgêra 6’ina ya awanbîyayîşê YPJ’yî ya cinîyan, keyeyanê şehîdan, dayîkan û fermandaranê YPJ’yî pîroz kerd.