Rojnameyê Newaya Jin bi manşetê “Înan ê ke morê xo dayo şorişî ro” vejîya. Rojnameyê Newaya Jin rojdemanê sey 8’ê Adare, Newroza 2019’î, grevê vêşanîye û 4’ê Nîsane ser vindeto. Reyna nuşteyê analîzî yê kulturîyî, alozîya sosyolojîke ya ke DAÎŞ bîyo sebebê ci û Başûr û akademîyanê komelîyan ser nuşteyî ca gênê. 

Rojnameyî de nuşteyê Sosyologe Nazan Ustundage yê analîzê 8’ê Adare ca gêno û Dîlan Bozane zî nuşteyê xo de bale anta çalakîyanê 8’ê Adare yê Amerîkaya Latîne, bi taybetî zî Arjantînî ser.

Rojda Yildirime nuşteyê xo de Newroze ercnaya. Gonul Kaya 4’ê Nîsane ercnayo. Nuşteyê xo de bale anta tecrîdê Îmralîyî ser û vato ‘Ocalan rewşa girane ya zindanî de azadîye keno pîl û bi fikir, vînayîş û hîsîyatê xo reseno heqîqetî.’

Nurgul Başarane ya ke 17’ê Kanûne 2018’î ra nat grevê vêşanîye de ya zî bi yew nuşteyê xo rojnameyî de ca gêna. Başarane nuşteyê xo de ca dayo waştişê Leyla Guvene û çalakwananê bînan. Aktîvîsta TJK-E’yî Şukran Sîncare zî nuşteyê xo de “polîtîkayanê Qirkerdişî” ser vindena.

Medya Doze zî nuşteyê xo de bale anta rastîya cinîyan a ke DAÎŞ’î awan kerda ser.

Surmanşetê rojnameyî de roportajê Zehra Dogane ca gêno û Berîtan Zagrose zî dagirkerîya Tirkîya ya Başûrê Kurdistanî ser vindeta.

Rojnameyî de nuşteyê nuştoxanê sey Çarçel Engîzeke, Evîn Zîlane, Zerya Gule, Feleknas Uca, Bêrîtan Nisêbîne, Fîdan Yildirime û Berjîn Têkoşere ca gênê.

Hetê bînî ra rojnameyê Newaya Jin o ke Nîsan a 2005’î de dest bi weşanî kerd û Ewropa de menge de rayêk vejîyeno 14 serrî yê xo qedînayî û kewt serra 15’ine.