Avûkata heqanê merdiman Margaret Owene, ronayoxa Înîsîyatîfê Kurdîstan de Haştîye û dîrektorê "Vîyayê Bi Rayîrê Demokrasîyî Aşitîye" ya û seba ke bale biancîyo grevê vêşanîyan û seba ke tecrîdê serê Rayberê Şarê Kurdî Abdullah Ocalanî bêro wedaritene ewro dest bi grevê vêşanîye kena.

Owena 86 serrîye verî ra nat seba heqanê Kurdan têgêrena. Owene vana Tirkîya Kurdan rê zulim kena û Îngilîstan zî paştdarîye dano Tirkîya û ez na rewşe qebul nêkena û mi rê zaf giran yena.

Owene derheqê çalakîya xo de wina va:

 “Ez seba projeyanê teqîbkerdiş û cigêrayîşan xeylî dolime şîya Kurdistanê Tirkîya û Surîye. Mi bêedaletîya ke Kurdan rê yena kerdene bi çimanê xo dîye. Mi tewr peynî Leyla Guvene ya ke 150 rojî yo grevê vêşanîye de ya zîyaret kerde. Seba ke bale biancîyo nê qewimîyayîşan ser tena yew çi mi dest ra yeno û ez xo mecbur hîs kena ke naye bika. Abdullah Ocalan temsîlkarê Kurdan o rastikên o û bêedaletîya ke ey rê yena kerdene, eslê xo de her kesî rê yena kerdene. Naye ra zî pozîsyonê ci, seba çareserkerdişê krîzî zaf muhîm o.”

Însîyatîfê Kurdistan de Haştîye zî yew beyanat weşana û wina va:

“Abdullah Ocalan hetê Tirkîya û îstîxbaratê DYA’yî ra bi operasyonê mîyanneteweyîyî 15’ê Sibate 1999 de Kenya ra ame remnayene û Ocalan o tarîx ra nat binê tecrîdî de yeno girewtene. Serra 2011’î ra nat avukatî nêeşkenê ey bivînê û 2015’î ra nat tena di dolimî tede pêvînayîşî ameyê kerdene. Tirkîya bi nê polîtîkayan hem hîqûqê xo binpay kena û hem zî Peymana Heqanê Merdiman a Ewropa îhlal kena.

8 hezar girewteyî grevê vêşanîye de yê

Leyla Guvene 7’ê Teşrîna Peyêne 2018’î ra nat seba ke na rewşe çareser bibo kewte grevê vêşanîye û ewro Tirkîya de 8 hezaran ra zêde kesî beşdarê çalakîyan bîyê û reyna Ewropa, Îngilîstan û Amerîkaya Vakurî de xeylî kesî seba ke tecrîd bêro wedaritene kewtê grevê vêşanîye.”

Beyanat de bale ancîyaye rewşa weşîya çalakwananê grevê vêşanîye ser û ame vatene ke heta tecrîd nêdarîyo we çalakwanî do tedawîyî red bikerê û seba naye zî waşt ke wa gamî bêrê eştene.

Beyanatî wina dewam kerd: ”Temmuza 2016’î de bi îlanbîyayîşê OHAL’î proses hîna zî bi giran û muxalefeto sîyasî û sendîkayî ameyî qedexekerdene. Kesê ke bi hawayê demokratîkî ameybî weçînitene wezîfe ra ameyî girewtene û Erdoganî kesê nêzdîyê xo tayînê cayê înan kerdî û nê pêro bi şupheyê terorî ameyî kerdene.

Wa CPT wezîfeyê xo bîyaro ca

Komîteya Vernîgirewtişê Îşkenceyî ya girêdayîya Konseya Ewropa serra 1999’î ra nat 7 dolimî şîya Îmraliyî. CPT tewr peynî 28-29’ê Nîsane 2016’ î de Îmraliyî zîyaret kerdo û Tirkîya ancax Adara 2018’î de destur dayo ke CPT raporê xo yê derheqê Îmraliyî de eşkera bikero. Ewro grevê vêşanîye her hetê dinyaye ra bîyê vila û CPT ganî rojêka avere game bierzo û Îmraliyî zîyaret bikero.

Ewropa, seba ke tecrîd bidarîyo we zaf nêşona Tirkîya ser. Ewro rewşa weşîya çalakwananê grevê vêşanîye bîya girane û hina ke mergî nêbîyê zêde CPT ganî derheqê Îmraliyî de tê bigêro.

Alî Poyraz, Nahîde Zengîne û Mehmet Yilmaz, Merkezê Komel ê Kurdan o ke adresa 11 Portland Gardens, Harringay, London N4 1HU de grevê vêşanîye de yê û Margaret Owene zî do 2’yê Nîsane de beşdarê na çalakîye bibo. Aktore Maxîne Peake zî do saet 19.00 de beşdarê çalakîye bibo û bi yew kombîyayîş paştdarîye bido çalakîye”