Platformê Cinîyan ê Dîcle yê Amedî Semtê Ofîsî de eşkerayîyêke daye û vera qetilkerdişê cinîyan nêrazîbîyayîşê xo mojna.

Îdarekara Komeleya Cinîyan a Roza Filîze Kaydu eşkerayîye wende û ard ziwan ke îqtîdar seba ke sûcanê xo binimno dişmenîya têkoşîn û îradeyê cinîyan keno. Filîze pare kerd ke şeş menganê peyênan de welat de 205 cinîyî hetê camêrdan ra ameyê qetilkerdene, 117 cinîyî bi hawayêkê şikdarî merdê. Filîze da zanayene ke Amed de 20 rojanê peyênan de 3 cinîyî ameyê qetilkerdene. 

Filîze dîyar kerd ke polîtîkayê şerî û krîzo ekonomîk bi hawayêkê xirabî tesîrê cinîyan kenê û vat: ''Wextê peyênî de cinîyî hetê faîlanê tîryakîyanê narkotîkî ra yenê kiştene. Seba ke polîtîkaya cezakerdişî vera tîryakîyan nêna caardene ê cinî û domanan rê benê gef. Cinîyê têkoşêrî tim hedefê îqtîdarî de yê. La têkoşînê ma paştîya xo daya felsefeya 'Jin, Jiyan, Azadî' û têkoşînê cinîyan ê kurdan. Têkoşînê ma do hertim serkêşîya cuyêka rûmetêne bikero.''

Çalakîye bi slogananê sey “Jin, Jiyan, Azadî”, “Bijî têkoşîna jinan” û “Bijî berxwedana jinan” qedîyaye.