Awankerdoxanê PKKyî ra Sakîne Cansize, temsîlkara KNKyî ya Parîsî Fîdan Dogane û endama têgêrayîşê ciwanîye Leyla Şaylemeze yê ke 9ê Çile ya 2013î de paytextê Faransa Parîs de ameyî qetilkerdene, serrgêra şeşine ya kişîyayîşî de Parîs de ameyî vîrardene.
Bi wesîleya serrgêra şehadetê hîrê cinîyan ê şorişgêran ê Kurdan Sakîne Cansize, Fîdan Dogane û Leyla Şaylemeze yê ke 9ê Çile ya 2013î de paytextê Faransa Parîs de ameyî qetilkerdene, rayberîya TJK-Eyî de sey her serre emser zî vîrardişêk ame organîzekerdene û xeylî temsîlkarê sazîyanê Fransa tewrê ci bîyî.
Rayraşîyayîşêko vernîya Merkezê Komelî yê Kurdî yê Demokratîkî de dest pêkerd, cinîyan pankartê ‘‘Kerdoxî bewlî yê, edelat tarîye de yo‘‘ û beyraq û dovîzê Sara, Rojbîne û Ronahî kiriştî. Çalakwanî saetê qetilkerdişî de resayê cayê qewimîyayîşî.Tîya de aktîvîsta TJK-Eyî Zeynep Dersime qiskey kerd.
Dersime vist vîrî ke cinîyê Kurdî 6 serrî yo seba bicaardişê edaletî senî mucadele danê û va: ‘‘Kerdoxî bewlî yê la hema edelat tarîye de yo. La ma do bi girdkerdişê xoverdayîşî tecrîdê serê Rayberîya ma bişiknê û wisarê şaran biafernê. Ma do şexsê hemraya Sarayan Leyla Guvene de tecrîdî bişiknê, faşîzmî birijnê û Kurdistan azad bikerê.‘‘
Sereka Têgêrayîşê Mucadeleyê vera Nîjadperestî Renne le Mîgnote zî bale ante ke 6 serrî yo qetilkerdiş nêameyo eşkerakerdene û vat ke ganî PKK lîsteyê terorî ra bêro vetene.
Bi nameyê Partîya Komînîstî ya Fransa Lan Brossatî zî vat ke roştnêkerdişê qetilkerdişî seba Fransa şermêko gird o.
Sereka Komela Kurdistanî ya Fransa Slyvie Jane zî vat ke ma soz dayo hîrê cinîyanê şorişgêran do mucadeleyê ma heta serkewtişî dewam bikero.
Bi nameyê CDK-Fyî hemserek Vedat Bîngolî zî seba tewrbîyayîşê çalakîya 12ê Çile veng da û vat ke ganî heme şarê Kurdî yê Ewropa û dostê ma mucadeleyê edaletî de ca bigêrî.
