Çapemenîya Azade ya Cinîyan (RAJÎN), Nujîyan Erhane ya ke serra 2017’î de, hetê hêzanê KDP‘yî ra ameyebî qetilkerdene yad kerde. Hêzanê KDP’yî 3’yê Adare 2017’î de hêrişê Xanesorî kerdîbî û Nujîyane no hêriş de bibî birîndar û 22’ê Adare de wefat kerdbi.
Koordînasyonê RAJÎN’î, serrgêra 2’yîn a mergê Nujîyan Erhane de a bi hurmet yad kerde û manaya nameyê aye îşaret kerd û va Nujîyan cuya neweye tarif keno.
RAJÎN’î derheqê Nujîyan Erhane de wina va: “Nujîyane serra 2005’î de bi çalakîya mertelanê ganîyî verê xo açarna bi koyanê Kurdistanî û Şengal de vera DAÎŞ’î şer kerd. Hêzanê KDP’yî şarê Êzidî terk kerd û kerd hedefê DAÎŞ’î û 3’yê Adare 2017’î de zî hêrişê ci kerd. Vera nê hêrişê îxanetkarî de, Nujîyane tewr vernî de ca girewt û bîyê hedefê guleyanê KDP’yî. 22’yê Adare de zî tewrê kerwanê şehîdanê azadîye bîye. Senî ke Nujîyane xêza Gurbetan, Xalîlan, Denîzan, Hebunan teqîb kerda, ma zî do xêza aye ra şorê û xêza şehîdanê çapemenîye teqîb bikerê.“
