Program de çalakîyanê yelegzerdan ra dima, polîtîkayê Serekkomar Emmanuel Macronî ser munaqaşayî bîyî. Vervatoxa Neteweyî ya France İnsoumîse û Hemkoordînatora Partîya Çepî  Danîelle Sîmonnete ke beşdarê programî bîyî seba Leyla Guvene paştdarîye waşte.

Sîmonnete destpêkerdişê programî de fotografê Leyla Guvene yo ke ser o fotografê Rayberê Şarê Kurdî Abdullah Ocalanî estbi akerd, bale ante rewşa Leyla Guvene ser û wina qisey kerd: ‘‘Ma tîya de tena cinîyîme. Ez wazena  şima rê qalê yew cinîya ke bîne ya ke parlamentera HDPyî ya bika. 6 ê Teşrîna peyêne ra nat grevê vêşanîye de ya. Ez wazena qal bika çunku ganî pêroyê dinyaye nê problemî de bibo eleqedar. Kurdan vera DAÎŞî şerêko bêemsal da û ewro hepisxaneyanê Tirkîya de 10 hezarî ra zêder girewteyê Kurdî estê.“

Sîmonnete vat ke hepisxaneyî û grevê vêşanîye problemê her kesî yê û  no derheq de ganî Fransa û medyaya ci nêzdîbîyayîşê xo bivurnê.