Qezaya Yenîşehîrî ya Amedî de 20’ê Adare de seba paştdayîşê grevê vêşanîye yê ke seba wedaritişê tecrîdê serê Rayberê Şarê Kurdî Abdullah Ocalanî dest bi çalakîye kerdo, 14 cinîyan çalakîyêk viraştebî.  Dimayê na çalakîye nê 14 cinîyî amebî destbendkerdene û 11 cinîyan rê cezaya kelepçeyê elektronîkî ameye birnayene. Hemsereka Qezaya Surî ya HDP’yî Sevîm Coşkune derheqê cezaya kelepçeyê elektronîkî de qisey kerd û da zanayene ke reya verên a ke Amed de cezayêka winayîye cinîyêk rê yena dayene.

Coşkune ard ziwan, seba ke ca hepisxaneyan de nêmendo, no metod yeno ceribnayene û vat, “Seba paşdayîşê grevê vêşanîye 20’ê Adare de ma ameyî destbendkerdene. 5 rojî ma nezaret de mendî. Mehkeme de cezaya kelepçeyê elektronîkî ma rê ameye birnayene. Dewlete bi nê metodî wazena îradeyê cinîyan bişikna. Ma 11 cinîyî keye de hepisxane de yê. No metod teyna vera cinîyan ê HDP’yî yeno bikarardene.

Coşkune bale ante serê xoverdayoxan û vat, ganî hukmat lezabez veng bido qîrayîşê xoverdayoxanê grevê vêşanîye û vat, ”Hemverê zextanê dewlete de ma do fek dewaya xo ya heqdare ra nêverdê. Seba ke Leyla Guvene heqdar a û ma zî leyê aye de yê. Ganî tecrîdê serê Ocalanî bêro wedaritene. Tecrîd sûcê merdimîye yo. Ez vengdayîş bi heme kesan kena, veng bidê qîrayîşê Leyla Guvene û girewteyan.”