Cinîyê kedkarê çapemenîye yê ke surgun de ciwîyene ronayîşê ROJÎNî (Yewîya Rojnamegeran a Cinîyan a Kurdîstanî) îlan kerd.

Bajarê Carleroî yê Belçîka de peynîya hewteyî de bi tewrbîyayîşê 50 delegeyan ê ke çapemenîya kurdan de xebityenî konferansêk ame viraştene. Konferans de rojdemanê sey qewîmîyayîşê sîyasîyî, rêxistinbîyayîş û plankerdişî ser o ame vindertene.

Qiseykerdişan de şerê dinya yo 3. ke dewam keno de bale ancîya muhîmîya rolê medya ser.

Ame vatene ke ganî heme dezgeyê çapemenî û weşanî hempar tê bigêrî û semedê bewlîkerdişê rojdemê cinîyan  xebata  pêresnayîşî bikerî.

ROJÎNÎ RONAYIŞÊ XO ÎLAN KERD

Konferansî ra dima bi eşkerayîyêka çapemenîye ROJÎNî ronayîşê xo îlan kerd. Endama heyetê weşanî ya Stêrk TVyî Gulîstan Îke bi kurdkî, endama heyetê weşanî ya Medya Haberî Heval Aslane zî bi tirkî eşkerayîye wende.

XOVERDAYÎŞ TIM DEWAM KENO

Eşkerayîye de ame vatene ke zulmo ke bi hemkarîya dewlet, camêrd, artêş û medya yeno kerdene, hemverê nê de merdimê ke rindî, roşnayî û hewlîye wazenê xoverdayîşê înan zî rixmê heme hêrişan bêmabên dewam keno. Merdimîya ke vera zulmkaran de mucadele kena serdestî nêeşkenî aye esîr bîgêrî.

ÇAPEMENÎYA AZADE YA KURDAN

Eşkerayîye de dîya vîrardene ke Medyaya Azade ya Kurdan ke bi slogana ‘Raştîyî do tarîye de memanî‘ kewta rayîrî û semedê caardişê heqaîqetî xo ra vêrta û bi desan şehîdî dayê rixmê surgun, qirkerdiş û heme hêrişan raştîyan ra fek vera nêdana û mucadeleyê vera serdestan de rayberîye kena.

ROLÊ CINÎYA KURDE

Eşkerayîye de rolê cinîya kurde ser o zî nê ameyî vatene: ‘‘Mîyanê çapemenîya kurdan de xora rolê cinîya kurde eşkera yo. Cinîyê kedkarê çapemenî yê kurdan bi des serran o medya de vera zihnîyetê serdestî-camêrdî mucadele kenî. Cinîyê kurdî nê mucadeleyî de tena ereq nê gonîya xo zî rişnenî û ramojnenî ke  mesele tena objektîfî tepiştiş nîyo, senî  û bi kam amac a tepiştiş o.

CINÎYÊ KEDKARÎ KE GANÊ XO DAYO

Cinîyê sey Emel Çelebî, Ronahî, Gurbetelî, Zeynebe, Canda, Dîdare, Rojînda, Berfîne, Hebûne, Yildize, Şîlane, Zîlane, Ekîne, Arjîne, Sarya, Nujîyan Denîze û Dilîşane ke medya sey cayê xoverdayîşî dîyêne nê mucadeleyî de ganê xo da. Ma zî do mucadeleyê înan ê erjayeyî bidê dewamkerdene.‘‘

BI ROJÎNÎ RAYÎRÎ RÊ DEWAM

Goreyê eşkerayîye cinîyê kedkarê çapemenîya kurdan ke surgun de xebityenê  la ruhê înan welatê înan de yo ewro ra tepîya rayîrê xo rê bi ROJÎNî (Yewîya Rojnamegeran a Cinîyan a Kurdîstanî) dewam kenî.  

HER KEDKARA ÇAPEMENÎ ENDAMA MECLÎSÎ YA

Meclîsê cinîyan ê ROJÎNÎ ke ame ronayene îdareyê ci rê dezgeyanê çapemenî yê cîya cîyayan ra sey temsîlkar 23 kesî ameyî vîjnayene. Heme kedkarê çapemenî zî sey endamê meclîsî yenî hesibnayene.

ROJÎN DO SE BIKERO?

ROJÎN xeberkarîya azadîya cinîyan xo rê esas gena. Vera heme hêrişan ê hemverê cinîyan de  kîşta cinîyan de ca gêna.

ROJÎN huner ra heta sîyasetî, kuçe ra heta  keyeyî, mucadele ra heta  rêxistinbîyayîşî, ekonîmî ra heta ekolojî, weşîye ra heta sporî her cayê cuye de bi îddîaya bîyayîşê veng, ziwan, pênûs û umîdê  cinîyan do xebaran teqîb bikero.