Cinîyê Swîsreyîjî seba ke bale biancê serê grevê vêşanîye, amadekarîyê xo yê seba çalakîya 7000 pankartan a ke 6’ê Nîsaned do bikerê dewam kenê. Cinîyan seba çalakîye verg da û vat, “Ma pêro pîya eşkenê bêvengîye bişiknê.”
Serkêşîya Têgêrayîşê Cinîyan ê Femînîstan ê Swîsre û enternasyonalan de seba 7 hezar girewteyan ê ke grevê vêşanîye de yê 6’ ê Nîsane de çalakîya "7000 pankartî" do bêra viraştene.
Çalakîye bi slogana “Ma vengê nê xoverdayîşî heşna, nika zî dora ameya ke ma nê vengî bidê heşnayene” do bêra viraştene. Cinîyî çarçewaya çalakîye de 6’ê Nîsane de seba bale biancê grevê vêşanîye xeylî bajaran de Swîsre de 7000 pankartan do abikerê.
Mevajê tu çîyêk nêbeno, çîyêk bikerê
Cinîyan da zanayene ke, bi paştdayîşê mîyanneteweyî ê eşkenê bala merdiman hîratir biancê serê xoverdayîşê Leyla Guvene û zîndanan. Cinîyan bale antê serê muhîmîya tewrbîyayîşê çalakîya 6’ê Nîsane.
Cinîyan vat, “Mevajê tu çîyêk nêbeno, çîyêk bikerê. Şaneşîya xo de, pencerayanê keyeyê xo de, karxaneyanê xo de, bîsîkletê xo de, wesayîta xo de, pirdan ser o, kuçeyan de; bi kilmî her cayan de ma pankartanê xo abikerê. Eke ma hemeyî çîyêk bikerê, bawer bikerê ma do na bêvengîye bişiknê. Ma cinîyî; wexto ke bîyî yew, ma do eşkenê her çîyî bibedilnê.”
Cinîyan seba çalakîye 6’ê Nîsane xeylî bajaran de amadekarîye kerde û vangdayîş bi her kesî kerd ke wa tewrê çalakîye bibê.
