Parlamentera HDPyî ya Amedî Semra Guzele derheqê çalakîya hemsereka KCDyî û parlamentera HDPyî ya Colemêrgî Leyla Guvena ke 68 rojî yo seba wedartişê tecrîdê serê Rayberê Şarê Kurdî Abdullah Ocalanî kewta grevê vêşanîye ercnayîşî kerdî.

Guzele vat: "Tecrîd tena Îmraliyî ser o tesîr nêkeno, hemeyê Rojakewtena mîyanêne ser o tesîr keno. Seba ke aşitî bêro Tirkîya ganî tavilî tecrîd bêro wedartene. Birêz Ocalan merdimêko rêze ra nêyo, o bi xo Rayberê Şarê Kurdî yo û hetê mîlyonan ra sey îrade ameyo qebûlkerdene. Heme dinya prosesê dîyalogî de bîye şahidê aşitî, demokrasî û azadî. La dimayê 5ê Nîsane ra şexsê Ocalanî de serê her kesî de dewrê tecrîdî ame destpêkerdene."   

HALÊ LEYLA GUVENE KRÎTÎK O

Guzele bale ante halê Guvene ser û nê vatî: “Halê Leyla Guvene resayo halêko krîtîk. Tansîyona ci tim vurena û heta nika 14 kîloyî dayê. Nêweşîyê Guvene yê verênî zî estbî û ganî îlac bigîro. Zîndananê bînan de zî îhtîyacîyanê tepişteyan bica nêanê. Rixmo ke vîtamînê Byî qanûnî yo nêdîyeno tepişteyan.

Hukmat seba ke çalakîya tepişteyan vindarno bêwijdan hêriş keno. Rayapêroyîye û medyaya Tirkan hemverê xoverdayîşî de çimê xo girewtê. Hukmat zano ke eke tecrîd wedarîyo do peynîya ci bêro. Naye ra fikranê birêz Ocalanî ra terseno û naye ra tecrîdî keno giran.”