Her gerîlayo/a ke ma koyanê azadîye de rastê înan yenê, wayîrê tradîsyonêkê xorî yê tarîxîyî yê. Her yew wayîrê hîkaye û rastîya cimatî yo. Înan ra yewe zî Sozdar Çîya ya.

Sozdar Çîya gerîlayêka ciwan a û hemverê polîtîkayanê înkar û çinkerdişî de, hemverê sîstemê kolonyalîstî de sere wedarto û şopa verênanê xo ser o verê xo dayo koyanê Kurdistanî, tewrê refanê Têgêrayîşê Azadîya Kurdistanî bîya. Mektebanê Mîyanênan ê dewleta Tirkî (YÎBO) de hewna ke emrê ci qij o ajanîye aye ser o yena ferzkerdene. hemverê na polîtîka de vejîyaye û verê xo da koyan.

Pîyê aye, Çîya qezaya Basa ya Şirnexî ra yo. Serra 1993 de sîstemê qorucîtîye qebûl nêkerd û hemverê hêrişan de verê xo dayo koyanê Kurdistanî. A game cinîya ci diganî bîya. Çîya tewrê refanê Têgêrayîşê Azadîya Kurdan bîyo.

Gerîla Çîya koyê Gabarî de wareyê fermandar Egîdî de şinaweno ke keynayêka ê amîya dinya. Naye ser o vano, ‘mi sozo ke da şarê Kurdî bica ard, ganî keynaya mi zî bica bîyaro’ û wazeno nameyê Sozdar binê aye ra.

Ma nê xoverdayîşê tarîxîyî de, Wareyê Pawitişî yê Medya de wisarêkê bêhempayî de yew gerîlaye vînenê: Sozdar Çîya. Verê çaya gerîlayan de ma dest bi sohbetî kenê.

Sozdare qalê vîrameyîşanê xo kena: “Hemverê operasyonanê pîlan ê çinkerdişî yê ke her cayê Kurdistanî de ameyêne kerdene, hêrê xalanê mi sere nêda ro û tewrê refanê PKK’yî bîyî. Rojêk bi telafonî maya mi şinawit ke pîyê mi koyê Cûdî de şer de heta guleyê xo yê peyênî bi qehremanî şer kerdo û şehîd bîyo. Maya mi heta wextêk mi ra nêvat. Dima ra rojêk ameye verê min û vat, ‘Pîyê to şehîd bîyo, çîyo ke keweno serê mile ma o yo ke ma rayîrê ê rê wayîr vejîyê.’

Pîyê mi rixmo ke zewejîyabi û domanêka ci estbi zî verê xo dabi koyanê Kurdistanî. Nê eşqê ê yê seba gerîlayî timî ez fînayêne mîyanê heyecanî.”

Sozdar Çîya ard ziwan ke aye tim mîyanê cigêrayîşî de bîya, waşto pîyê xo nas bikero û vat, “Domanîye de hewn û xeyalê mi bi ke pîya bi pîyê xo şer bikerî. Mi soz da xo ke sîlehê gerîlayanê şehîdan erd de meverdî. Bi nê cigêrayîşî mi verê xo da koyanê Kurdistanî ser û tewrê refanê PKK’yî bîya.”

Gerîla Sozdare vat, “Mi sozê xo bica ard, Koyê Gabarî de tewrê gerîlayan bîya, heman rayîrî de rayra şîya, mi paştîya xo daye heman kereyî û heman kemeran ser o aresîyaya.”