Edama Meclîsê PAJKî Ronahî Serhad derheqê kadroyanê serkêşan ê têgêrayîşê azadîye yê cinîyan ê Kurdîstanî ra Raperîne Amed (Delale Azizoglu) de ANFyî rê qisey kerd.

Ronahî Serhad ard ziwan ke aye Serra 2000î de Şehîde Raperîne Amed Ewropa de nas kerde û vat:  ‘‘Wexto ke embaze Raperîne ameye Ewropa, di serrî Komployê Mîyannetewî ra vîyartbî. Na babete hem seba partî hem zî seba ameyoxê şarê ma û hem zî seba têkoşînê azadîya cinîyan zah muhîm bî. Hemraye Raperîne ê demî de seba ke cinîyan rê rayberîye bikera wezîfe girewt xo ser’’

Şar û cinîyan reyde têkilîyêka xozayîye viraşte

Ronahî Serhadî dîyar kerd ke Raperîne Amed wexto ke Ewropa de mend hem mîyanê şarî de hem zî mîyanê cinîyan de rolê xo yê rayberîye bi hewayêko serkewte dewam kerd û vat, ‘‘Çend nêwaza ke Ewropa de bimana zî seba ke baş zanayêne Komployê Mîyanneteweyî ameyo plankerdene, waşt ke Ewropa de komployî bikera warê têkoşînî. Embaze Raperîne bi rayberdiş û têkoşînî tarzê xo da roniştene.’’

Xebatanê newe ra awankerdişê PKKyî de ca girewt

Ronahî Serhadî ard ziwan ke Hemraye Raperîne newe ra awankerdişê PKKyî de ca girewt û wina vat, ‘‘Serra 2004î de têgêrayîşê ma prosesêkê talûkeyî ra vîyartêne. Çunke kesayetanê tasfîyekeran hewl dayêne ke partîya ma  bigîrê xo dest. Ê deman de prosesê newe ra awankerdişê PKKyî dekewt rojdem. Embaze Raperîne ê demî de bi rolêkê muhîmî bi pêşnîyaranê xo ê prosesî de ca girewt.’’

Sey darêke bîye ke kokê xo resnaybî xorînîye

Ronahî Serhadî îfade kerd ke, serranê 1996-1998î de Raperîne Amed Rayber Apoyî ra perwerde girewta û vat, ‘‘A tim seba ke biba cewabê perwerdeyî ke Rayber Apoyî ra girewto, mîyanê hewldayîşî de bîye. Embaze Raperîne her tim bi hewayêko zelal vindertêne û sey darêke bîye ke kokê resnaybî xorînîye. Her tim bawerî dayêne hemrayanê xo.’’

Heskerdişêko gird mabenê ma hemînan de afirna

Ronahî Sehad ard vîrardene ke Raperîn Amed serra 2011î de Endama Dîwana Konrga Gel bîya û vat, ‘‘ Şehîde Raperîne ê demî ra seba averşîyayîşê konfedaralîzma demokratîkî, awankerdişê meclîsan û şar û cinîyî bibê wayîrê îdare, kedêka zaf pîle daye. Rasta zî embaze Raperîne mabênê ma de heskerdişêko gird afirna. Ma bi ê heskerdişî bi hewayêko xurt Rayberîye ra yenê girêdayene.’’