Bado ke Şorişê Rojawanî, Rojhelat û Vakurê Sûrîye de vila bi semedê herêmanê sey Minbic, Tebqa, Reqa û Dêrazorî yê ke ameyî xelsinayene, muneqeşayanê yew rêxistinîyeya newî dest pêkerd. Nê xebatê ke binê serbanê rêxistina Kongra Starî de ameyêne kerdene, dewrê Yewîya Cinîyan a Zenobîya bîye ke 2021 de ronayîşê xo îlan kerd.

Cinîyan ê ereb, suryanî, armenî, çerkez, tirk û kurdan bi şîarê ''Ma do bi têkoşînê cinîyan şorişê xo bipawê û haştîye bîyarê ''Reqa de kongre kerde û ronayîşê Yewîya Cinîyan a Zenobîya îlan kerd. Zenobîya nameyê qiralîçeya Titmurî yo ke tarîx de semedê cinîyan têkoşîn kerdo û verê zilmî de milê xo çewt nêkerdo.

Endama Heyetê Rayberdişî ya Yewîya Cinîyan a Zenobîya Nesrîne Hesen derheqê xebatanê xo de ANFyî rê qisey kerd.

Nesrîne Hesen vat: ''Her yew rengê logoyê ma yew şarî temsîl keno. Xebatê ma zî na çarçewe de yenê kerdene. Ma bi waştişê resayîşê heme cinîyan ê nê waranê xelisnayeyan dest pê nê karî kerd. Waştişê ma oyo ke cinîyî xo aver bêrê û ma bi hêzê xo payra bimanê. Reyna ma vaşt wa cinîyî xo hetê dîplomasî, ekonomî, leşkerî û sewbînî ra her cayê cuye de aktîf ca bîgêrê û mîsyonê serkêşîye bîyarê ca.

Ma Minbic, Reqa, Tebqa û Dêrazor de çar buroyî akerdî. Nê buroyan de 11 komîteyî est ê. Rolo esasî nê komîteyan cinîyan bikerê tewrê xebata rêxistinîye û înan perwerde bikerê. Ma do ameyox de heme Sûrîye de xebatanê xo hîra bikerê. Akademîya Şehîd Adar Harunî ya herêma Tebqa de hem semedê keyeyan hem zî semedê komelî perwerde yeno dayene. Reyna seba ke verê şîdetî û zewajê qijan bêro girewtene zî keyeyî yenê zîyaretkerdene û nê problemî akademî de yenê destgirewtene.

Emser ma do semedê bedilnayîşê camêrdan, perwerdeyê camêrdan zî bidê. Ma do sey rêxistina cinîyan a Rojawanî xo biresnê heme cinîyan ê dinya û têkoşîno ke ma rixmê heme zext û zordarîye kenê, ma do bidê eşnawitene. Cinîyî ewro pê projeyê Neteweya Demokratîke ya Rayber Abdullah Ocalanî têkoşînê xo ver bi serkewtişî kirişenê.''