Têgêrayîşê Cinîyan ê Kurdan ê Ewropa (TJK-E) derheqê çalakîyanê ke do Strasbourg û Berlîn de bêrê viraştene eşkerayîyêk weşanaye.

Eşkerayîya TJK-E’yî de nê ameyî vatene:

“Çalakîyê grevê vêşanîye yê bêdem-bêagêrayîşî ke bi hemraye Leyla Guvene û hemra Nasir Yagizî bîyî sembol ewro hemeyê zîndanan de, Strasbourg, Almanya, Hollanda, Îngilistan, Galler, Kanada, Awusturya û Swîsre de bîyê vila û resayê merheleyêka muhîme. Amaco bingeyên ê çalakwananê ke ewtarayê bedelêkê winayênî bidê wedartişê tecrîdê serê Rayberîya ma û bicaardişê heqanê unîversal û huqûqîyan o.

Îqtîdarê AKP-MHP yê faşîstî bêvengîya xo ya hemverê mergî muhafeze kerda, bi nê hawayî her roja ke şina bi faşîzmî tarîyîya xo hîna keno xorî.  Sîstemê îşkenceyî yê Îmraliyî û tecrîdo mutleq ewro tena serê şexsêk de nê; serê hemeyê cimatî de yeno bicaardene. Tecrîdo ke serê Rayberîya ma de yeno bicaardene heman wextî de serê şarê Kurdî de zî yeno bicaardene. No sîstemê tecrîdê mutleqî û îzolasyonî yeno manaya binpaykerdişê huqûqê unîversalî. Sere de bêvengîya Konseya Ewropa û ya CPT’yî bêvengbîyayîşê sazîyanê Ewropa nê sûcî rê hemparbîyayîş o.  Bêvengîya hemverê nê xoverdayîşê heqdarî yena manaya qebûlkerdişê tecrîdî û faşîzmî.

Labelê ganî no rind bêro zanayene ke heme xoverdayoxê grevê vêşanîye û cinîyê Kurdan û şaro Kurd o ke dorê nê xoverdayîşî de ameyê têhet heta netîceyêk nêgêrê û îzolasyonî nêqedînê do çalakîyanê xo bidomnê. Seba ke waştişê xoverdayoxanê grevê vêşanîye bica bêrê û CPT û Konseya Ewropa tavilî bikewo mîyanê têgêrayîşî 1’ê Nîsane ra tepîya do Strasbourg de vernîya Konseya Ewropa de û Berlîn de zî vernîya Parlamentoyê Federalî de çalakîyê roniştişî û grevê vêşanîye yê kîtlekîyî bêrê kerdene. Ma do bi nê çalakîyan bibê vengê xoverdayoxanê grevê vêşanîye. Ma veng danê Konseya Ewropa û CPT’yî ke gureyê xo bica bîyarê. Çalakîyê ma heta netîceyêk nêro girewtene do dewam bikerê.

Xoverdayîşê grevê vêşanîye resayê merheleyêka krîtîke. Ganî her kes bi ruhê seferberîye bikewo têgêrayîşî mîyan.  Heme şarê ma ganî nê prosesî de tewrê çalakîyan bibo û veng bido vengê xoverdayoxan. Ma sey Têgêrayîşê Cinîyan ê Kurdan ê Ewropa (TJK-E) veng danê heme şarî ke tewrê çalakîyanê roniştişî û grevanê vêşanîye yê ke do 1’ê Nîsane de vernîya Konseya Ewropa û Parlamentoyê Federalî yê Berlînî de bêrê viraştene bibê. Roje roja xurtkerdişê xoverdayîşî ya!”