Têgêrayîşê Cinîyan ê Kurdan ê Ewropa (TJK-E) bi tewrbîyayîşê bi desan meclîsê cinîyan, komun, însîyatîf û sazîyan ê ke Ewropa de yê kampanyayêka newî daya destpêkerdene. Kampanyaya ke  vizêr ameya destpêkerdene serrêk dewam kena û hîrê merheleyê ci estê.  

TJK-Eyî derheqê kampanya de eşkerayîyêka nûştekîye de daye.

SEBA KE BIRESÊ RAŞTÎYANÊ KOMELKÎYAN

TJK-Eyî vat slogananê înan ê bingeyênan ra yewe ‘Beno ke a/o ti zî bibîyêne’ ya. TJK-Eyî bale ante rolê felsefeyê Rayberê Şarê Kurdî Abdullah Ocalanî yê azadîya cinîyan ser o û nê vatî: “Her cinî û camêrdê ke têgêrayîşê azadîya kurdan de ca gênê ganî xo destê şidetê sîstemê pedeşahîyî ra bixelesnê. Ma bi na kampanya wazenê serê tehlîlkerdişê şexsan ra biresê raştîyanê komelkîyan.” 

MERHELEYA EWILÊNE YA KAMPANYA: PERWERDE

Goreyê ekerayîye do kampanya serrêk dewam bikero û mîyanê ê wextî de çalakîyê aktîfî bêrê organîzekerdene. Do derheqê şidetê hemverê cinîyan de fealîyetê tehlîlkerdişan ê tarîxkî, kulturkî, sîyasî û îqtîsadîyî bêrê rayraberdene.

* Merheleya ewilêne ya kampanya de fealîyetê derheqê famkerdişê prosesê kolonîzebîyayîşê cinî û muhtewaya têkilîya ci ya sîstemî ca bigîrê. Na merhele de panel, semîner û fealîyetê perwerde û hişmendkerdişî estê.     

MERHELEYA DÎYINE: ÇALAKÎ Û ORGANÎZEBÎYAYÎŞÊ CI

* Merheleya dîyine de çalakî û organîzebîyayîşê ke hişmendî pratîk de bica biyarê estê. Bi nê amacî do mîtîngî, numayîşê kuçeyan, rayraşîyayîşî bêrê organîzekerdene, kursîyê serbestî ronîyê, afîş û vilawekî bêrê vilakerdene. Bi nê hawayî rayapêroyîye bêro hayîdarkerdene.

MERHELEYA HÎRÊYINE: ÇARESERÎYÊ MENDEYÎ

* Merheleya hîrêyine de zî sazîbîyayîş û organîzebîyayîşê ke do seba vernîgirewtişê şidetî çareserîyan peyda bikerê yenê amackerdene. Do organîzasyon û sazîyanê cinîyan dir platformê hemparî bêrê awankerdene, bunyeya nê platforman de xetê mişewreyî bêrê viraştene û grûbê xopawitişî bêrê organîzekerdene.

Eşkerayîye de ame vatene ke bi slogana ‘Beno ke a/o ti zî bibîyêne’ yeno waştene ke bale biancîyo şidetê hemverê cinîyan û merdimî na raştîye ra nêremê, te dir hesab bivînê.