Bajarê Troyesî yê Fransa de, Komela Kulturî ya Elewîyan a Aubeyî (AKM), bi çarçewaya ‘Şidetê vera cinîyan polîtîkayêka sîstematîk a’ panelêk viraşt û persa cinîyan û şidet munaqeşe kerd.

Panel o ke Keyeyê Ciwanan ê Troyesî de ame viraştene, aktîvîsta Têgêrayîşê Cinîyan ê Kurdan ê Fransa (TJK-F) Gulanaz Dumane û Sereka Yewîya Cinîyan a Elewîyan a Fransa (UFAF) Sultan Şahîne beşdarê ci bîyî. Hetkara Sereka Aube KKE’yî Fatoş Denîz Yeşîlyurte û sereka  2’ine ya UFAF’î  û Federasyonê Elewîyan ê Demokratîkî (FEDA) Oya Yerlîkaya zî  sey meyman beşdarê panelî bîyî.

Dimayê nawnayîşê vîdeo yo ke derheqê şidetê vera cinîyan de ameyo pêşkêşkerdene, Sultan Şahîne beşdarbîyayoxî silam kerdî û derheqê şîdetê vera cinîyan de zanayîşî dayî. Şahîne ard ziwan ke, cinîya Elewîyan zî şidet vînenê û sey heme cinîyan ê ke Ewropa de ciwîyenê cinîyê bextwaştoxî zî şidet vînenê. Şahîne qiseykerdişê xo de bale ante serê têkoşînê cînîyanê Kurdan û vat, rixmê her tewirê şidetî cinîyê Kurdan têkoşîn danê, no têkoşîn de cinîyan bedelê giranî dayê û Sakîne Cansize, Leyla Şaylemeze ve Fîdan Dogane yad kerdî.

Gulanaz Dumane qiseykerdişê xo de bale ante serê têkilîye şidetê vera cînîyan û  grevê vêşanîye û vat, “Rayberîya Leyla Guvene de ewro nêzdîyê 8 hezar girewteyî grevê vêşanîye yê bêdem û bêagêrayîşî de yê û wazenê ke tecrîd  bêro wedaritene. Metodê çarçewaya kerdişê tecrîdî, tecrubeyê zîhnîyetê camêrdî yo. No semed ra, seba vera şidetê cinîyan de vindetiş, vera tecrîdî de vinetiş o zî.”

Hemvervatoxa Dergehê FEDA ya Parîsî Husnîye Kuçukkeleşî zî qiseykerdişêk kerd û bale ente serê têduştîya cinîyanê Elewîyan  û vat, “Eslê ci de ganî camêrdî xo nê şermî ra bixelesnê. Cinîyê Elewîyan zî şidet vînenê. Labelê perse Elewîtîye de nîya; Elewîyan de perse esta.”