Hemsereka DBP’yî Sebahat Tûncele ke Zîndanê Kandira de esîr a, 15’ê Çele ra grevê vêşanîye de ya. Tûncele derheqê grevanê vêşanîye de û muhîmîya weçînitişanê cayîyan ê 31’ê Adare ANF’yî rê qisey kerd. Tûncele destpêkê qiseykerdişî de Newroza her kesî pîroz kerde.

Sebahat Tûncele vist vîrî ke Leyla Guvene endamêka Têgêrayîşê Cinîyan ê Kurdan a ke bi serran o seba azadîya cinîyan mucadele kena û vat, a seba awankerdişê sîstemêkê azadîperwerî mucadele dana.

Tûncele bale ante ke zextê hemerê grevê vêşanîye dest pêkerdê, no demo ke sîyaset problemanê cimatkîyan bêçare verdano, nê grevî bîyî wesîleya afernayîşê umîdêk.

Tûncele ard vîrî ke xoverdayîşê grevê vêşanîye pêl bi pêl çar hetanê dinya de vila bîyê û vat, “Ez bawer a ke xoverdayîşo ke bi serkêşîya Leyla Guvene û xeylî hemrayan ê cinîyan rayra şino do bi ser bikewo. ‘Huqûqo taybet’ û polîtîkaya îzolasyonî ya ke nika Îmrali de yena bicaardene, şexsê Birêz Ocalanî de hemverê hemeyê şaranê Tirkîya de yê. Qedîyayîşê tecrîdî tena seba Kurdan nê seba hemeyê şaranê Tirkîya yo û do bibo destpêkê prosesêkê neweyî û muhîmî.”

Hemsereka DBP’yî Sebahat Tûncele bale ante ke tekane rayîrê tarîtîye ra vejîyayîşî ya îqtîdarê AKP-MHP’yî yê faşîstî ra xoverdayîşê hemverê tecrîdî yo ke Leyla Guvene ci rê serkêşîye kena û bi hezaran kesî zî dima ra rayra şinê.

Xoverdayîş zor dano îqtîdarê faşîstî

Tûncele ard ziwan ke ganî çew nêkewo gumanî mîyan û vat, “Xoverdayîşê zîndanan û teberî zor dano îqtîdarê AKP-MHP’yî yê faşîstî. Naye ra seba binfînayîşê tecrîdî bi heme rayîr û metodan hêriş kenê û kenê ke nêverdê rayapêroyîye bi waştişanê xoverdayoxan pê bihesîyê. Înanê ke heqê qanûnî û huqûqî yê Birêz Ocalanî desteser kerdê û kenê ke bi polîtîkaya tecrîdî têkilîya ê ya cimatî bibirnê, do bikerê ke xoverdayîşê seba naskerdişê heqanê Birêz Ocalanî nêro eşnawitene. Labelê qerardarîya çalakwanan zor dana îqtîdarê faşîstî.”

Embazê xoverdayoxî heme bicoş û bimoral ê

Tûncele ard vîrî heme zîndananê Tirkîya de kesê ke dewaya PKK û PAJK’î ra zere de yê xo ver danê û 1’ê Adare ra bi hezaran tepişteyî û tewqîfkerdeyî grevê vêşanîye de yê.

Tûncele vat, “Serkewtişê xoverdayîşê ma do rayîrê prosesêkê winayênî akero ke hem problemê Kurdan bingeyê azadî û seypêyîye ser o hal bibo, hem zî Tirkîya bibo demokratîke û Rojakewtena Mîyanêne pêgirewtişêk serê bingeyê aşitî, seypêyîye û demokrasîyî de virazîyo.”

Hemsereka DBP’yî Leyla Guvene, Nasir Yagiz û xoverdayoxanê grevê vêşanîye silam kerdî û veng da her kesî ke xoverdayîşî bikerê pîl.

Ma ra yewe azad nêbo, kes azad nêyo

Tûncele ard ziwan ke paştîdayîşê seba çalakîya înan seba mucadeleyê azadîya cinîyan û ameyoxê azad ê demokratîkî yê şaranê Tirkîya zaf muhîm o û vat, “Tirkîya de êyê ke hemverê sîstemê mewcûdî de vejênê, êyê ke wazenê vernîya demokrasîyî û aşitîye bibo a, êyê ke wazenê heqê merdiman û azadîya ci bi hawayêk ke goreyê anorê merdimîye bibo; ganî her ca de nê xoverdayîş û mucadeleyê hemverê faşîzmî bikerê pîl. Eke ma ra yewe zî azad nêbo, tu kes nêbeno azad. Eke cayêk de şer û zulm esto çew ma ra nêeşkeno xo ewle bivîno. Naye ra dem ameyo ke ma seba aşitî û azadîya Rojakewtena Mîyanêne refanê xo bişidênê, paştîdayîşî bikerê vêşî û bêvengîye xo ser ra bierzê.”

Rengê prosesî do bi xoverdayîşê ma bewlî bibo

Hemsereka DBP’yî Sebahat Tûncele peynîya pêvînayîşî de weçînitişê cayîyî yê 31’ê Adare yê Tirkîya û Vakurê Kurdistanî ercnayî û vat, “Weçînitişê cayîyî yê 31’ê Adare seba azadî û demokrasîyî muhîm ê. Seba ke vernîya sazîbîyayîşê faşîzmî bêro girewtene û faşîzm bêro zihîfkerdene, seba xurtkerdişê azadî û demokrasîyî muhîm ê. Naye ra lazim o ke şarê ma şiro serê sindoqan, reya xo bido û reya xo rê wayîr vejîyo.

Peynîya peynî de yo ke reng û averşîyayîşê prosesî bewlî bikero xoverdayîşê ma yo. Ganî kar heme nê bingeyî ser o bêro awankerdene. Eke xebatkarê ma heme bi hawayêkê bimoral, bicoş û bawerîya serkewtişî nizdîyê xoverdayîşî bibê do no çî bibo sebeb ke şar bi ser bikewo. Xoverdayîş do netîceyanê weçînitişî ser o tesîr bikero. Ez embazanê ma yê ke xebatanê weçînitişî kenê û şarê ma rê serkewtiş wazena. Rixmê zext û hêrişan de zî ez bawer a ke HDP do morê xo bido serkewtişanê pîlan ro û şarê ma do dorê slogana ‘Yê ma yo’ bibo yew. Serkewtiş yê ma yo.”