Zafer Bahadiro ke Hepisxaneyê Ceyhanî yê Girewteyî de yo, 1'ê Adare ra nata vera tecrîdkerdişê Rayberê Şarê Kurdî Abdullah Ocalanî grevê vêşanîye de yo.

Zafer Bahadir Edene de ameyo dinya û uca de bîyo pîl.  Verê 4 serran ame tewqîfkerdene û ci rê 15 serrî cezaya hepisî ameye birnayene. Dayîka ey Ayşe Bahadire vat, “Ma  Colemêrgî ra yê. Vernîya 35 serran rîyê zext û zordarîye ra ma ameyê tîya. Lajê mi tîya de bi pîl. Seba ke ma tîya de zî kultur û têkoşînê xo ra fek ra nêverda, zext û zordarîye tîya de zî dewam kerde.”

Dayîke Bahadire derheqê rewşa lajê xo Zafer Bahadirî de zanayîşî dayî û vat, “Wexto ke ma  ey de qisey kerd, vat ke rewşa mi baş a. Labelê rewşa hevalanê ey baş nîya, ê zî naye vînenê. Awe, sole, şekir nêdanê înan. Vîtamînê înan zî nêdanê înan. Nika grevê vêşanîye de yê. Înan no qerar dayo. Ma nêeşkenê vernîya înan bigê. Ez na rastîye vînena, gelo dewlete nêvînena? Her roje cenazeyî hepisxane ra yenê vetene. Êdî kes nêeşkeno verê ciwanan bigo, hîşyarîya ‘çalakîyanê fedaîyan mekerê’ zî vernîya înan nêgêna. Teyna waştişêkê înan esto. O zî; wedaritişê tecrîdî yo. Êdî bes o, hîna ke dore nêameya ciwanêkê bînî ganî tecrîd bêro wedaritene. Ez venga şarê Kurdî dana; êdî werzê serê payan. Şima do heta key bi nê hawayî bêveng bimanê.”