Nêrazîbîyayîşê vera îşkenceyê serê Endama Heyetê Îdareyê Herêmî yê Demokratîkî û TJA Rojbîne Çetîn dewam kenê. Sîyasetmedar, huqûqnas û temsîlkarê rêxistinanê komelê sivîlî yê herême vera îşkenceyî nêrazîbîyayîşê xo mojna.

Hemşaredarê Artemêtî Medenî Ozerî îfade kerd ke îqtîdar tedaya nasname, kultur, estbîyayîş û erjanê şarê kurdî keno ke îşkenceyê vera Rojbîne zî na çarçewe de yo. Ozerî vat: ''Îşkenceyê vera cinîyan ê kurdan polîtîkayêka sîstematîk a. Ez îşkenceyê vera Rojbîne şermezar kena.''

Wekîlê HDPyî yê Îdirî Habîb Eksîkî zî vat: ''Tirkîya de hînî qanûn çin o. Nika ra pey beno ke her kesî rê îşkence bikerê. La rojêke no îşkencekerî do bêrê hukmkerdene.''

Serejê Komeleya Jîngehî ya Wanî (ÇAV-DER) Alî Kalçikî zî ard ziwan ke îşkence sûcê merdimî yo û îşkenceyo winasên barbarî ya.

Avûkat Cemal Demîrî zî vat: ''Îşkence û zorbazîye dewam kenê. Kesê ke no îşkence kerd ganî bêrê tepiştene.''