Parlamenterê Partîya Sosyalîste, Hewze û Çepe yê Swîsre yê ke semedê baleantişê serê grevê vêşanîye çend rojî cuwa ver eşkerayîya çapemenî dabî, na rey zî derheqê babete de vilaweka hempare pare kerde.

Vilaweka ke bi nameyê parlamenteran Carlo Sommaruga, Carolîne Martî, Jean Burgemeister û Jean Rassîaudî ra ame weşanayene de sere de Konseya Federalî ya Swîsre û Hukmatê Kantonê Cenevre rayapêroyî ya mîyanneteweyîye ra ame waştene ke  semedê  paştdayîşê xoverdayoxanê grevê vêşanîye çîyêk bikerê.

Vilaweke de grevê vêşanîye yê ke rayberîya Leyla Guvene de dest pêkerdî û zîndanan û xeylî merkezanê Ewropa ra bîyî vila ardîyayî vîrî û ame vatene ke rewşa weşîya xoverdayoxan kewta merhaleya krîtîke û ame waştene ke wa her kes vengê çalakwanan bieşnawo û paşt bido înan. Reyna bale ameye antene serê hêrişê dewleta Tirkî yê serê Kurdan û ame vatene ke rejîmê Erdoganî  şîdetê  xo yê vera Kurdan domneno. Serê HPD’yî de zextê girdî estî. Selahattîn Demîrtaşî ya pîya bi hezaran sîyasetmedarê Kurdan zîndanan de yê. Vera nê qewîmîyayîşan bêvengmendiş nêbeno. Ganî Kantonê Cenevre û Konseya Federalî ya Swîsre cade vera Tirkîya  bikewê  dewre û berpisîyarîya xo ke heta ewro nêarda ca bica bîyarê.