Seba ke tecrîdê serê Rayberê Şarê Kurdî Abdullah Ocalanî bêro wedaritene û seba ke paştdarîye bidîyo çalakwananê xoverdayîşê grevê vêşanîye, bajarê Hîldesheîmî yê Almanya de çalakîya ronayîşê çadire ya seba 6 mengan dest pêkerd.
Bajarê Hîldesheîmî yê Almanya de çalakîya çadire ya seba 6 mengan ameye destpêkerdene.Çalakîye hetê Komunê Cinîyan ê Şehîd Meryeme ra, roja Yewşeme de ameye destpêkerdene û sazîyanê cinîyan ê herêma Salzgîtterî zî paştdarîye daye çalakîye. Çadire merkezê bajarî de ameye rafîstene û seba ke bale biancîyo tecrîd û çalakîyanê grevê vêşanîye, vilawekî ameyî vilakerdene.
Çalakwanan, afîşê xoverdayoxan ê ke çalakîya fedaîyîye kerda girewtî xo dest. Hemverfeka Komunê Cinîyan ê Şehîd Meryeme Xeco Donma çalakîye de qisey kerd û va: “Ma ewro seba ke tecrîdî bişiknê na çalakîye kenê. Heta ke tecrîd we nêdarîyo ma do çalakîyanê xo dewam bikerê. Pêro şarê Kurdî yo ke Ewropa de yo, ganî rawirzo payan ser.”
Donma seba ke wezîfeyê xo bîyaro ca venga CPT’yî, sazî û hukmatanê Ewro da û va CPT û hukmatê Ewropa bi bêvengîya xo paştdarîye danê Erdoganî. Reyna Donma va “Wedaritişê tecrîdî destê CPT’yî de yo û ganî CPT nê selahîyatê xo bîyaro ca û rolê xo bivîno.”Komîteya Tertîpî ya Çalakîye zî kerd eşkera ke, çalakîye do mabênê rojanê Dişeme û Îne de, verê dêra Jakobî de, mabênê saetanê 17 û 19’î de bêro viraştene.
