Çalakîyê paştdayîşê grevê vêşanîye

Çalakîyê paştdayîşê grevê vêşanîye yê ke seba wedartişê tecrîdê serê Ocalanî yenê viraştene, dewam kenê.

Ewopa de çalakîyê şermezarkerdişê tecrîdî û paşdayîşê grevê vêşanîye û rojeyê mergî yenê domnayene.

Koln

Bajarê Kolnî yê Almanya de xoverdayîşê rojeyê mergî yo ke vizêr ame destpêkerdene hetê ciwanan ê Kurdan û enternasyonalîstan ra ame silamkerdene. Ciwanan rayîr trafîkî rê qefilna û bi beyraqanê PKK‘yî û posteranê Ocalanî çalakîyêk viraşte. Ciwananê ke meşaleyî kiriştî bi slogananê, ‘Biciwîyo xoverdayîşê zîndanan‘ û ‘Ciwanî fedaîyê Ocalanî yê‘ bale ante serê tecrîd û xoverdayîşê grevê vêşanîye û rojeyê mergî.

Parîs

Paytextê Fransa Parîs de zî ciwanan banê Organîzasyonê Efû yê Mîyanneteweyî de çalakîyêk viraşte. Çalakîya ke Rêxistina Ciwanan ê Sosyalîstan Young Struggle (YS) zî paştî daye ci de derheqê grevê vêşanîye de zanayîş ame dayene. Çalakwanan berpirsîyaranê rêxistinî dir pêvînayîş viraşt. Çalakîye de qerarê pêvînayîşêkê bînî yê hîna hîrayî ame girewtene.

Basel

Bajarê Baselî yê Swîsre de bi çalakîyêk tecrîd û bêvengîya Ewropa ameyî şermezarkerdene û xoverdayîşê grevê vêşanîye û rojeyê mergî ameyî silamkerdene. Çalakîya ke hetê Platformê Paştdayîşê Grevê Vêşanîye ra ameye organîzekerdene de xeylî vilawekî ameyî vilakerdene.