Kurdîstanijan şaristananê Berlin, Stuttgart û Munihî yê Almanya de pê çalakîyanê xeyme hêrişê bi çeka kîmyewîye yê dewleta tirke şermezar kerdî.

Dusseldorf de çalakîya xeyme roja 3. de verê Parlamentoya Eyaletê NRWyî de dewam kerde. Çalakîya 5 rojan rayberîya Federasyonê FED-MEDî û YJK--E de yena kerdene. Hunermend Comêrd û xeylêk sîyasetmedarî zî tewrê çalakîyî bîyî. Çalakîye de vilawekî ameyî wendene û Hemsereka KON-MEDî Zubeyde Zumrut qisey kerd. Zumrute qiseykerdişê xo de venga şarê kurdî, şarê Almanya û pêro şaranê Ewropa da ke 13ê teşrîna peyêne de NRW Dusseldorf de tewrê çalakîya rayraşîyayîşî bibê. Dima Doktor Mustafa Alîyî qisey kerd û venga dewletanê Ewropa da ke vera çeka kîmyewîye tewir bigêrê.

Stuttgart de çalakîya xeyme roja diyîne de dewam kerde. Çalakîkeran semedo ke bale biancê hêrişanê kîmyewîyan ser kincê sipî girewtî xo rê û maskeyê gazî kerdî rîyê xo. Çalakîkera dormeyî rê derheqê hêrişan û çalakîya xo de agahîyî dayî û îmzayî arê dayî. Çalakîye ewro roja hîrêyîne de do biqeda.

Çalakîya xeyme ya Berlinî vizêr dest pêkerd û do 3 rojan dewam bikera. Çalakîye de standê agahîdayîşî ame akerdene. Çalakîye de aktîvîstanê Meclîsê Cinîyan ê DEst-Danî, TJK-E û Komelê Azadî vilawekî vila kerdî û eşkerayîye daye. Eşkerayîye de venga OPCW û dezgehanê mîyanneteweyîyan ame dayene ke şorê, cayanê hêrişan de cigêrayîşî bikerê.

Munih de zî çalakîya xeyme vizêr dest pêkerde û do 3 rojan dewam bikera. Çalakîkeran semedo ke bale biancê hêrişanê kîmyewîyan ser kincê sipî girewtî xo rê û maskeyê gazî kerdî rîyê xo. Çalakîkeran verê xeyme de ke nêzdîyê Parlamentotê Bavyera bîye, pê dowîzan hêrişê bi çeka kîmyewîye yê dewleta tirke şermezar kerdî.