Platformê Weçînayîşî yê Kede û Azadîye yê Depijan ê Ewropa, seba Partîya Çep a Keske dest pê karî kerd. Platformî kombîyayîşê xo yo verên şaristanê Bonnî yê Almanya de kerd.

Hemşaredara verêne ya qezaya Rêzanî ya Amedî Zubeyde Zumrut kombîyayîş de qisey kerd û vat: ''Kar û xîretê weçînayîşî yê şarê Depe, Xarpêt û Çewlîgî do serkewtişanê pîlan bîyarê.''

Seba platformî 21 temsîlkarî ameyî dîyarkerdene. Sere de Almanya, Ewropa de nê 21 temsîlkarî wezîfeyanê koordînekerdeyan do bikerê.

Kombîyayîş de qala girîngîya çapemenîye-medya ameye kerdene û wina ame vatene: ''Platform ganî teyna platformê weçînayîşî nêbo, wa bibo sîwanêka depijan.''

Platform wazeno xo biresno pêro şarê Depe yê Ewropa.