Duisburg de şehîdê çalakîyanê fedayîyan û Luzern de zî şehîdê Kotolî ameyî yadkerdene.

Şaristanê Dusiburgî yê Almanya de Umît Acaro ke vera tecrîdî bedenê xo da adirî ver, Ugur Şakaro ke 2019 de vera Komployê Mîyanneteweyî bedenê xo dabi adirî ver û şehîdê bînî yê çalakîyanê fedayîyan Zulkuf Gezen, Ayten Beçet, Mahsum Pamay, Zehra Saglam, Siraç Yuksek, Medya Çinar, Yonca Akinci û Enver Çelîk ameyî yadkerdene.

Babîyê Umît Acarî yadkerdiş de pare kerd ke lajê ci seba vindarnayîşê tecrîdî û îmha bedenê xo dabî adirî ver.  Yadkerdiş de sloganê sey “Şehîd Namirin” û “Bijî Serok Apo” ameyî berzkerdene.

Şaristanê Luzernî yê Swîsre de gerîlayê şehîdî Hogir Botan (Şerîf Adlim), Rênas Civyan (Bedran Erîn) û Berxwedan Goyî (Rizgar Kara) ê ke 19ê temmuza 2024î de Kotol de şehîd bibî ameyî yadkerdene. 

Vervatoxê Komîsyonê Keyeyanê Şehîdan Salîh Hezexî tîya de qisey kerd û pare kerd ke gerîlayî vera tecrîd û îşxalî mesuldarîyanê xo anê ca. Hezexî venga pêro kurdan da ke ê zî verê gerîlayan de mesuldarîya xo bîyarê ca.

Maya Haştîye Fatma Toren û Temsîlkarê KOMAWî Mustafa Karahanî zî yadkerdiş de qisey kerd û ard ziwan ke ê do tim rayîrê şehîdan teqîb bikerê.

Qiseykerdişê keyeyanê şehîdan ra dima seba Berxwedan Goyî şîn ame ronayene û keyeyê ey serweşîyî qebul kerdî.