Ozdemîrî ard ziwan ke amacê çalakîye o yo ke hemverê qirkerdişanê Anatolîya, Kurdistan û Mezopotamya yê ke serê şar û bawerîyan de yenê bicaardene vajê hendî bes o.

Ozkan Ozdemîro ke Tirkêko Elewî û şorişgêr o endamê Konfederasyonê Koçberanê Eciqnayeyan yê Ewropa (AvEG-Kon) yo, grevê xo yê vêşanîye yê bêdem û bêagêrayîşî Komeleya Karkeranê Koçberan ê Tirkîya (ACTÎT) de domneno.

Ozdemîrî derheqê sebebê çalakîya xo de vat ke tecrîdê serê Rayberê Şarê Kurdî Abdullah Ocalanî tena tecrîdêko serê şexsêk de nêyo û eke şar wazeno kultur û cuya xo ya azade bidomno ganî hemverê tecrîdî de vejîyo.

Ozdemîrî wina qisey kerd: “Ez tecrîdê serê Birêz Ocalanî sey tecrîdêkê serê xo vînena. Bi nê hawayî bi nê grevê vêşanîye ez karakter û anorê xo pawena.

Xeylî qirkerdişî ameyî sereyê Kurdan, heman wextî de ameyî sereyê Elewîyan. Nika eke merdimêk yan zî cimatêk hemverê nê qirkerdişan de veng nêvejo, estbîyayîşê xo yê cimatkîyî, îmkanê cuya seypêye û azade zî bi peyê destê xo tehn dano.

Grevê vêşanîye qezencêko îdeolojîk o, kîşta nê de destkewteyê ê yê bînî zî virazîyayî. Mesela birayê birêz Ocalanî ê dir pêvînayîş viraşt, birêze Leyla Guvene zîndan ra serbest amî veradayene. No hetê tarîxî ra ameyo îspatkerdene ke sere de xoverdayîş dest pêkeno, dima ra dorê ê xoverdayîşî de şar yeno pêser û dima ra kedkarî zî tewrê ci benê û xoverdayîş reseno serfirazîye.

No xoverdayîş birastî zî bi serkewtişanê pîlan aver şino. Her bajarê Ewropa de, xeylî cayanê dinya de xeylî çalakîyî yenê viraştene. Merdimî eşkenê tewrê nê çalakîyan bibê û merdimanê dorê xo tewrê ci bikerê. Herêmanê ke manenê ûca eşkenê partîyanê sîyasîyan, sendîkayan û xeberdaran ser o zextan bikerê ke na babete ser o vinderê. Bi kilmî; eke ma bibê perçeyêkê xoverdayîşî ma do serfiraz bibê.”