Binê roşnîya fikranê Rayberê Şarê Kurdî Abdullah Ocalanî de rêzekonferansê bi sernameyê 'Ma Dinyaya Xo Apey Wazenê', 'Xo Ver Bidê, Bigêrê û Newe ra Awan Bikerê', 'Perwerdeyî Xoser Bikerê û Xo Birêxistin Bikerê' yê bi şîarê 'Vera Modernîteya Kapîtalîste Vejîyayîş' roja diyîne de dewam kerd.

Panelê bi sernameyê 'Eko-Sîstem' û 'Têkoşînê Vera Qirkerdişê Komelkî' de Endamê Têgêrayîşê Ekolojî yê Mezopotamya Necmettîn Turk, Prof. Harriet Friedman, Ekolojîste û Aktîvîsta Heqanê Cinîyan a Pakîstanî Azra Talat Sayeed û Ekolojîste-Aktîvîsta Heqanê Merdiman Dawide Grasso qisey kerd.

Endamê Têgêrayîşê Ekolojî yê Mezopotamya Necmettîn Turko ke Wendekarê Doktpra yê Zanîngehê Hamburgî yo, qiseykerdişê xo de bale ante ser ke dewleta tirke xozaya Kurdîstanî qir kena û cografyaya kurdan pêşkêşê şîrket û dewlemendanê tirkan kena. Turkî îfade kerd ke dewleta tirke wazena Kurdîstan de peynîya heywankarîye û zîretî bîyara. Turkî vist vîrî ke serranê 90an ra nata dewleta tirke daristananê Kurdîstanî vêşnena û şarî dana koçkerdene. Necmeddîn Turkî da zanayene ke dewleta tirke herêmanê gerîlayan de çekanê kîmyewîyan şuxilnena û vat: ''Dewleta tirke wazena komelê kurdan û erdê kurdan qir bikera.''

Ekolojîste-Aktîvîsta Heqanê Merdiman Dawide Grasso derheqê xebatanê xo yê ekolojîkan ê serê Rojawanî de agahîyî dayî û vat: ''Fikrê Abdullah Ocalanî vera çinkerdişê sîstemê kapîtalîstî eşkenê seba xoza binê rayîrê xelase. Rayîrê felsefe û roşnvîrîye yê Ocalanî eşkenê bibê alternatîfê modernîteya kapîtalîzmî. Vera kapîtalîzmî merdimî eşkenê dormeyê fikranê Ocalanî de xo ver bidê.''

Beşê diyînî yê panelî de bi moderatorîya Havîne Guneşer Komelnase Nazane Ustundag, Vervatoxa KJARî ya Ewropa Maryame Fathî, Profesorê Averşîyayîşê Globalî yê Zanîngehê Helsinkî Barry Gills û Aktîvîsta Defend Kurdistan a îtalyane Veronica Maio qisey kerd.

Vervatoxa KJARî ya Ewropa Maryame Fathî, qala xoverdayîşê 'jin, Jiyan, Azadî' kerde û vat: ''Sîstemê kapîtalîzmî yê camêrdan beno sebebê qirkerdişê cinîyan. Cinîyê ke sere wedarnenê, raştê şîdet û teda yenê. Rejîmê Îranî dişmenê cinîyan o. Şîarê 'jin, jiyan, azadî' vera rejîmî pêro beşê komelî kerdî yew.''

Komelnase Nazane Ustundag ard ziwan ke Erdlerzê Mereşî yê 6ê Sibate de xebatê hetkarîye hîrê rojan ra dima resayê herême û dewleta tirke merdimê zerrîwazî asteng kerdê. Ustundage vat: ''Abdullah Ocalan vera dezgehanê dewlete komelbîyayîşî esas gêno.''

Profesorê Averşîyayîşê Globalî yê Zanîngehê Helsinkî Barry Gillsî da zanayene ke kapîtalîzmî ra xelase sîstemê Abdullah Ocalanî de yo. Gillsî vat: ''Ocalanî seba kurdan rayîrêko bîn awan kerd. Ganî ma nê rayîrî ser o nîqaşan bikerê.''

Aktîvîsta Defend Kurdistan a îtalyane Veronica Maio panel de vat ke ganî esasê fikranê Ocalanî de vera kapîtalîzmî têkoşîn bêro kerdene.

Panelê bi babeta ''Huner roja ma de senî eşkeno hetkarîya têgêrayîşanê şorişgêran û têkoşînan bikero? Gelo huner zanistêkê azadîye yo' de Filistînî ra hunermende Ayreene Anastas, Îranî ra hunermend Rene Gabrî û aktîvîstê hollandayîjî David Neurdenburgî qisey kerd.

Aktîvîstê hollandayîjî David Neurdenburgî dîyar kerd ke hêzê îqtîdarî wazenê tarîxê Kurdîstanî çin bikerê û bi arkeologanê dewletgîran de xebitîyenê. Ey vat: ''Kurdîstan de zaf berhemê tarîxî ameyî remnayene û vînîkerdene. Rojawan de şorişî ra dima Muzeyê Arkeolojî awan bi. DAÎŞî Sûrîye de zaf zerar da berhemanê tarîxîyan.

Rebe Gabrî vat: ''Huner seba ma teyna warêk nîyo ke profesyonelan afernayo. Huner warêk o ke têkoşîn û cuye tede cagênê. Huner seba ma pêroyîyan o.''

Panel pê pers û cewaban qedîya.