Endama DAÎŞ'î Omaîma Abdî ya ke hemwelatija Almanya ya û vejîya werte ke bajarê Hamburgî yê Almanya de ya û eşkera bi ke hêzanê asayîşî a xeternak nêdîya û hewca nêdîyo ke cipersayîşê ci zî bikerê.
Dewleta Almanî ya ke sembolê YPG/YPJ'î qedexe kerdê û cehd kena paştdayîşê hêzanê demokratîkî yê Sûrîye reyde krîmînalîze bikera, vera çeteyanê DAÎŞ'ijanê ke dişmenê merdimîye yê de qet caardişêk nêkena.
Muxabîrê televîzyonê El-An Jenan Moussa çend rojî verê cû vetibi werte ke çeteya DAÎŞ’î Omaîma Abdî dimayo ke Reqa hetê hêzanê QSD’yî ra ameye xelisnayene agêreya Almanya û seke tu çîyêk nêbîyo cuya xo dewam kerda.
Gruba Partîya Çepe ya Meclîsê Eyaletî ya Hamburgî rewşa hemwelatija Almane ard rojdemê meclîsî û pêşnûmeya persî pêşkêşê rayberîya eyaletî kerde. Pêşnûmeya persî de, ke Hemsereka Gruba Partîya Çepe Cansû Ozdemîre amade kerde, ame persayene ke têkilîya Abdî bi DAÎŞ’î yan zî grubanê radîkalan esta yan ney.
Hukmatê eyaletî yo ke Partîya Sosyal Demokrate (SPD) û Partîya Keskan ra yeno pê, cewabêko sosret dabi pêşnûmeya persî ya Ozdemîre. Hukmatê eyaletî dabi zanaye ke Abdî ya DAÎŞ’ije seba asayîşî xeternak nîya, coka hêzanê asayîşî a sîstemê RADAR-ÎTE’î ra derbaz nêkerda.
Ozdemîre na rewşe bi şîdet rexne kerde û vat, “Cewabê hukmatê eyaletî seba merdimanê ke DAÎŞ’î ra îşkence dîyo û qurbanbîyayan, cewabêko giran o.”
