Avûkatê Belçîkayijî: Waştişê xoverdayoxan meşrû yê

Xeylî avûkatanê Ewropayijanê ke paştî daye xoverdayoxanê Strasbourgî ard ziwan ke waştişê xoverdayoxan heqo meşrû yo û tewirê CPT’yî nêno famkerdene.

Belçîka ra avûkatê  endamê buroyê huqûqî yê Progress Lawyers Networkî yê ke dewayanê sîyasetmadaranê Kurdan û macîran teqîp kenê şîyî serdana xoverdayoxanê Strasbourgî yê ke 130 rojî yo semede wedartişê tecrîdê serê Rabyerê Şarê Kurdî Abdulah Ocalanî grevê vêşanîye yê bêdem-bêagêrayîşî de yê.

Avûkatan tayî xoverdayoxan de pêvînayîşêko kilm viraşt  û derheqê halê înan de zanayîş  girewt û dima zî bi nameyê komîteya tertîpî derheqê waştişanê xoverdayoxan de zanayîş ame dayene. Ame vatene ke xoverdayoxî biqerar ê ke  heta wedartişê tecrîdî çalakîya xo rê dewam kenê û avûkatan ra ame waştene ke Konseya Ewropa (KE) û Komîteya Vernîgirewtişê Îşkenceyî (CPT) dir pêvînayîşan virazê û waştişê çalakwanan bidê eşnawitene.

Avukatan bi eşkerayîyêk bale ante ke tecrîd nêno qebûlkerdene. Avûkatan ra Joke Callewaertî  vist vîrî ke mehkemaya Belçîka faalîyetê PKK’yî  rê vato teror nêyo û PKK û Tirkîya sey  rêxistinê biçekî name kerdî. Avûkatan ra Selma Benkhelifa zî ar ziwan ke ê paştî danê mucadeleyê şarê Kurdî  û va: ‘‘Waştişê xoverdayoxan biheq o, meşrû yo. Kam beno wa bibo heqê heme tepişteyan esto ke bi avûkat û merdimanê xo pêvînayîş bikero. No waştiş ganî CPT zî qebûl bikero. Hêzê CPT’yî esto  şiro Erdogan û Tirkîya ser? Ma naye nêzanê. Ma do derheqê waştişê grevê vêşanîye de CPT’yî rê mektubek bişawê. CPT cuwar zî şibi Îmrali. Nika no tewirê înan nêno famkerdene. Ma do înan ra vajêke ‘Waştişê xoverdayoxan biheq û meşrû yo, rixmê naye qey şima ra heta nika reaksîyonêk çîno‘ û înan ra biwazê ke wezîfeyê xo bica bîyarê.‘‘