Bi taybetî eyaletê Bavyerayî de her roje bi bihaneyê alayê YPG/YPJ'yî polîs û dozgerî tehqîqatanê neweyan akenê. Tewr peynîye de rejîsor Ulî Bez seba ke 2017 de serê hesabê xo yê Facebookî ra alaya YPJ'yî pare kerdibi Mehkemeya Îdarî ya Munîhî de vejîya verê mehkeme.

Mehkeme eksê cezaya pereyan ke tehqîqatanê bînan de dabî, derheqê Bez qerar da ke bêro veradayene. Xora Bezî da zanayene ke o do cezaya pereyan nêdo û vatibi, “Hewca bikero ez do şora hepisxaneyî de bimana.” Avûkat Hartmut Wachtlero ke mehkeme de avûkatîya Ulî Bezî keno derheqê qexekerdişê alayanê YPG-YPJ'yî de ANF’yî rê qisey kerd.

Pêroname nêşîkîna dewleta bihuqûqe ra

Wachterî ard vîrî, qerarê qedexekerdişî yê serê PKK’yî 1993 de ame dayene û vat, “O wext bi nê qerarê qedexeyî tespîtê ci amabi kerdene ke do kamcîn sembolî bêrê qedexekerdene. La bado bi hawayêko ecêb resimê Ocalanî zî kerdî nînan ser.  Bê tewr qerarêk, bi nuştêkê zereyî yê Wezaretê Karanê Zereyî dayîşê qerarî û no sûc qebûlkerdişê nêşîkîno dewleta bihuqûqe ra.”

Wachtlerî ard vîrî ke hêzanê YPG-YPJ'î Êzidî komkiştişê DAÎŞ’î ra xelisnayî û na rastîye medyaya Almanan  de xeylî ca girewte la rixmê naye zî Wezarê Zereyî sembolê nê hêzan qedexe kerdî û dewam kerd, “Ser de zî dimayê pêronameya qedexeyî eşt serê keyeyanê merdiman, ameyî muhakemekerdene û cezaya pereyan înan rê ameye birnayene. Polîsî bi naye zî nêvinetî,  seke serebûtê Ulî Bezî de yeno dîyayene, seba ke  xebera sereştişê keyeyî serê hesabê xo yê  Facebookî ra pare kerda, tehqîqat ci rê ame akerdene û ame muhakemekerdene.”

Nê muhakemekerdişan ra teyna Erdogan keyfweş beno

Goreyê Wachtlerî dadgerê ke dewaya Bezî de nîyadanê, seba ke parekerdişê Bezî herinda propagandaya PKK'yî, derheqê parekerdişê xeber a derheqê sereştişê keyeyî de ercnaye û ceza ci rê nêbirnaye.

Parêzer Wachtlerî vat tehqîqatê seba alayanê YPG-YPJ'yî Almanya de keyfê kesî nîyano û vat, “Nê tehqîqatî  û cezayê ke yenê dayene teyna keyfê kesêkî anê, o zî Erdogan o ke Sûrîye de hêrişê Kurdan keno.”