Ciwanê ke Berlîn de bî Akademîya Sporî ya Tolhildanî akerde. Merasimê akerdişî NAV-DEM’ê Berlînî de ame viraştene û ciwanê ke binê sîwanê Ciwanên Şorişgêr de xebate kenê, endamê meclîsanê NAV-DEM û DEST-DAN’î, çalakwanê grevê vêşanîye Omer Bagdûr, Şîyar Xelîl, Mele Mûstafa Tûzak û Cemal Kobanê zî tewrê merasimî bîyî.

Şîyar Xelîlî merasim de qisey kerd û vat, “Rayberê ma seba ciwanan vatêne, ‘ciwanî hêzê motorî yê cuye, aşitî û çareserîye yê.’ Na yewe ra ma na gama ke hetê ciwananê ma ra erzîyaya bi kêfweşî pêşwazî kenê.’

Akademîya Sporî ya Tolhildanî de do bi hawayêkê sîstematîkî sporê pêkewtişî bêro mûsnayene.

Hemsereka NAV-DEM’î yê Berlînî Nûjîyan Gunaye merasim de qisey kerd û kêfweşîya xo seba akerdişê akademiye ard ziwan.

Endama rayberdişê Ciwanên Şorişgêrî Nîlufer Dêrsime zî xoverdayoxê grevê vêşanîye silam kerdî.

Akademî hetê mamosteyê boksî Remzî Kartayî ra amî akerdene. Merasim de Hozan Aydin, Newşa Harikî û Reşo Ere hünere xo pêşkêş kerd.