Swîsre, Danîmarka, Almanya û Fransa de Kurdistanijî vejîyayî meydanan, bêvengîya vera tecîdê serê Ocalanî û grevê vêşanîye protesto kerde.

Cenevre

Cenevre de rayberîya Têgêrayîşê Ciwanan ê Şorişgêrî de vernîya ofîsê Neteweyê Yewbîyayeyî (NY) de çalakîyêk ameye viraştene. Çalakwanan bale ante serê grevê vêşanîye û bêvengîya NY, CPT û Konseya Ewropa yê vera tecrîdî şermezar kerde.

Delemont

Bajarê Delemontî de zî bi çalakîya vengvetişî  bale ancîya serê tecrîd û grevê vêşanîye. Çalakwanan xeylî vilawekî vila kerdî û Ewropa ra waşt ke vera nê qewimîyayîşan bêveng memano.

Bern

Bern de zî aktîvîstanê Têgêrayîşê Ciwanan ê Şorişgêrî merkezê bajarî de bi çalakîyêk xoverdayîşê grevê vêşanîye silam kerd û tecrîd protesto kerd.

Basel

Basel de zî bi heman waştişî   Kurdistanijî û dostê înan meydanan de bî. Çalakîye de şexsê Leyla Guvene de xoverdayoxê grevê vêşanîye ameyî silamkerdene û bêvengîya Ewropa ameye şermezarkerdene.

Lozan

Lozan de zî  Meclîsê Cinîyan ê Lajîne çalakîyêk organîze kerde. Mîtîng de semedê paştdayîşê grevê vêşanîye vengdayîşî ameyî kerdene û ame vatene ke heta ke waştişê xoverdayoxan nêrî ca ê do çalakîyan rê dewam bikerê.

Zurîh

Zurîh de hetê Platformê Paştdayîşê Grevê Vêşanîye  ra vernîya partlamento de mîtîngêk ame viraştene. Çalakwanan  tabûto  ke ser o ‘Zîndan ra meyîtî vejîyenê, hayîya şima esta?‘ kirişt û bi slogana ‘Waştişê Leyla waştişê ma yê‘ bale ante grevê vêşanîye ser.

Aarau

Aarau de zî bi heman waştişî çalakîyêk ameye viraştene. Xeylî kesî tewrê ci bîyî û  bi slogana ‘Waştişê Leyla Guvene waştişê ma yê‘ qîrayî.

Kopenhag

Paytextê Danîmarka Kopenhag de zî semedê baleantişê serê grevê vêşanîye di semtanê cîya-cîyayan de standî ameyî akerdene. Standê ke hetê Meclîsê Cinîyan ê Sêvê ra ameyî akerdene de derheqê grevê vêşanîye û tecrîdê serê Ocalanî de vilawekî ameyî vilakerdene.

Frankfurt

Bajarê Franfurtî yê Almanya de zî çalakîya ke hetê Meclîsê Cinîyan ê Amara, Sara û Nujîne  ra sîtematîk yena viraştene, no hewte zî dewam kerde. Çalakwanan veng da CPT’yî û waşt ke kaykerdişê hîrê meymûnan caverdo û berpirsîyarîya xo bica bîyaro.

Mantes La Jolie

Bajarê Mantes La Jolie yê Fransa de zî Kurdistanijan bi rayraşîyayîşêk  tecrîd protesto kerd û xoverdayîşê grevê vêşanîye silam kerd.