Bajarê Strasbourgî yê Fransa de çalakîya roniştişî ya girseyî hewteyo 3’ine de ya. Çalakwanê ke wazenê bale biancê serê xoverdayoxanê grevê vêşanîye yê vera tecrîdkerdişê Ocalanî ANF’î rê qisey kerd.

Temsîlkarê ÎHD’yî yê Swîre Mîne Çetînkaya bale ante serê bêxemî û bêvengîya CPT û Konseya Ewropa û vat, “CPT yo ke seba vergirewtişê îşkenceyan û  kerdişanê xirabinan ameyo awankerdene, çi heyf ke babeta Birêz Abdullah Ocalanî  de, ke bi serran o nêeşkenê avûkat û keyeyê xo bivîno, game nêerzeno. Ganî waştişê çalakwanan bêrê qebûlkerdene, tecrîd bêro wedaritene û vernîya merdişê merdiman bêro girewtene.”

Hemsereka NCDK’yî  ya Rennesî Saadet Kiliçe,  da zanayene ke ê wazenê cewabêk bidê grevê vêşanîye û bibê vengê çalakwana. Kiliçe vat, “Hende dayîkî seba domananê xo îsyan kenê; ganî ma na çalakîye rê bibê çare, bibê vengêk. Ma zî vanê 'Êdî bes o'."

Hozan Kawayî zî ard ziwan ke, Ocalan îradeyê Kurdan û vat, “Wazenê ke na rastîye bin bikerê. Labelê şarê ma şexsê çalakwananê grevê vêşanîye de vera naye têkoşîn keno. Cehdkerdişê  dewleta Tirkî o seba binkerdişê nê xoverdayîş do ser nêkewo, seba ke Rayber Apo felsefeyêk o. Senî ke ma strananê xo de zî anê ziwan, Rayber Apo seba merdimîye îdeolojî yo, îrade yo, felsefe yo. Bi taybetî seba Rojakewtena Mîyanêne çareserî yo.”

Hunermend Xelîl Xemgînî zî ard ziwan ke fikr û amancê înan yew ê û vat, “Ma do dimayê rojdemê kesêk de nêşorê û  ma tecrîdî wedarê. Seba ke Rayber Apo wina musna ma û  çîyo  muhîm o  yo ke nê terzî, dest xoverdayîşo ke Leyla Guvene dayo destpêkerdişî ra nêverdê.”

Endamê Komîsyonê Pêserekerdiş û Haştîye yê Meslîsê Luzernî Kadrî Ozkanî ard vîrî ke kênaya ey 27 serrî yo zîndan de ya û vat, “Tayê erjê Ewropa estê: azadîye, haştîye, merdimîye. Labelê nika tecrîdkerdişê Birêz Ocalanî vejîyayo teberê sewîyeya merdimîye, CPT wezîfeyê xo nêano ca. Hem Konseya Ewropa hem zî Parlamentoyê Ewropa na hawara Kurdan rê bîyê kerr û lal. Ê cewab nêdê ma zî ma do heta wedaritişê tecrîdî têkoşînê xo dewam bikerê.”