Konseya Kurdan a Demokratîke ya Fransa (CDK-F) Parîs de bi 300 delegeyan kongreya xo viraştene. Salona kongre de fotografê Rayberê Şarê Kurdî Abdullah Ocalanî, pankarta “Ma tecrîdî bişiknê, faşîzmî birijnê û Kurdistanî azad bikerê” û pankarta derheqê çalakîya grevê vêşanîye ameyî akerdene. Xeylî temsîlkarê dezgehanê sîvîlan, sendîka û partîyanê sîyasîyan  tewrê kongre bîyî.

Weçînayîşê dîwanî ra dima , qiseykerdişî ameyî kerdene. Rayberê Şaredarîya Parîsî Brossat, Hemvervatoxê Keskan Regol, parlementero verên Sergîo Coronado, çalakwanê grevê vêşanîye Ozkan Ozdemîr û aktîvîstê Sendîkaya CGT’yî Jacques Leleuyî qiseykerdişî kerdî.

Ozdemîr:  Ma do berê cuya azade a bikerê

Çalakwanê grevê vêşanîye Ozkan Ozdemîrî kongre de qisey kerd û vat, “Heme dezgehê Kurdan binê hêrişan de yê. Ewro Ewropa de zî Mezopotamya û Mîr Muzîk ameyî padayene. Serê rêzdar Abdullah Ocalanî de tecrîdêko giran esto. Vera tecrîdî xoverdayîşêko gird esto. Ma wazenê ke Tirkîya û Vakurê Kurdistanî de ma do berê cuyêka azade  û demokratîke a bikerê.”

Qiseykerdişanê kongre de ame bewlîkerdene ke têkoşîno ke Fransa de û Ewropa de yeno dayene qels o û ganî xoverdayîş bêro xurtkerdene.

Dimayo ke kongre de raporî ameyî wendene û munaqeşeyî ameye kerdene, Heyetê Dîsîplînî, Heyetê Kontrolî, Dîwanê Serekîye ameyî weçînayene.